पानशेत धरणात बुडून तरुणाचा मृत्यू

पुणे, ता. १९ : पानशेत धरणात पोहण्यासाठी उतरलेल्या तरुणाचा बुडून मृत्यू झाल्याची घटना गुरुवारी उघडकीस आली. सद्दाम चाँद व्हसुरे (वय ३०, रा. घुले कॉलनी, नांदेड सिटीजवळ, सिंहगड रस्ता) असे मृत तरुणाचे नाव आहे. या प्रकरणी वेल्हे पोलिस ठाण्यात अकस्मात मृत्यूची नोंद करण्यात आली आहे.
सद्दाम हा मित्रांसोबत रायगड जिल्ह्यातील माणगाव येथे गेला होता. तेथून परतताना गुरुवारी दुपारी तो प्रकाश माळी, अनिल ओव्हाळ व राहुल गायकवाड यांच्यासह पानशेत धरण परिसरात आला. धरणाच्या काठावर बसून चौघांनी काही वेळ विश्रांती घेतली. त्यानंतर सद्दाम पोहण्यासाठी धरणात उतरला, मात्र पोहत असताना तो पाण्यात बुडाला.
मित्रांनी तातडीने त्याला पाण्याबाहेर काढले असता तो बेशुद्ध अवस्थेत होता. घटनेची माहिती मिळताच सहायक पोलिस निरीक्षक किशोर शेवते व पोलिस हवालदार मोघे यांनी घटनास्थळी भेट दिली. पोलिसांनी सद्दामला वेल्हे येथील ग्रामीण रुग्णालयात दाखल केले, मात्र त्याचा मृत्यू झाल्याचे डॉक्टरांनी घोषित केले.