गुगलचे कार्यालय बॉम्बने उडविण्याच्या धमकीमुळे खळबळ

पुणे, ता. १३ : पुण्यातील गुगलचे कार्यालय बॉम्बने उडवून देण्याबाबत धमकीचा निनावी फोन आल्यामुळे एकच खळबळ उडाली. बॉम्बशोधक व नाशक पथकाने गुगलचे कार्यालय आणि परिसरात कसून तपासणी केली, परंतु पथकाला काहीही संशयास्पद आढळून आले नाही. दरम्यान, मुंबई पोलिसांनी निनावी फोन करणाऱ्या व्यक्तीस हैदराबाद येथून अटक केली आहे.

पुण्यातील मुंढवा परिसरात एका कमर्शिअल बिझनेस सेंटरच्या इमारतीमध्ये गुगलचे कार्यालय आहे. रविवारी रात्री मुंबईतील गुगलच्या कार्यालयात एकाचा निनावी फोन आला. त्या व्यक्तीने पुण्यातील गुगलच्या कार्यालयात बॉम्ब ठेवल्याचे सांगितले. त्यावर गुगलच्या अधिकाऱ्यांनी मुंबई पोलिसांना ही माहिती दिली. मुंबई पोलिसांनी ही बाब पुणे पोलिसांना कळविली. त्यानंतर मुंढवा पोलिस आणि बॉम्बशोधक पथक तातडीने गुगलच्या कार्यालयात पोचले. त्यांनी कार्यालय आणि इमारतीच्या परिसरात तपासणी केली. मात्र, काहीही तथ्य आढळून आले नाही.

मुंबई पोलिसांना तपासादरम्यान तो फोन हैदराबाद येथून आल्याचे निष्पन्न झाले. त्यावरून हैदराबाद पोलिसांच्या मदतीने निनावी फोन करणाऱ्या व्यक्तीला अटक केली. तो पुण्यातील गुगल कार्यालयात काम करणाऱ्या एका कर्मचाऱ्याचाच भाऊ आहे. रात्री मद्यधुंद अवस्थेत त्याने हा फोन केल्याची माहिती समोर आली आहे.
-----