झूलॉजी असोसिएशन फोरमचे ‘फर्ग्युसन’मध्ये उद्‍घाटन

पुणे, ता. २१ ः जैवशास्त्रात संशोधनाच्या अनेक संधी उपलब्ध आहेत. त्या संधींचे सोने करून घेता आले पाहिजे. त्यासाठी विद्यार्थ्यांनी संशोधकवृत्ती वाढवत संशोधनाकडे डोळसपणे पाहावे, असे मत सावित्रीबाई फुले पुणे विद्यापीठाच्या प्राणीशास्त्र विभागाचे प्रा. डॉ. राधाकृष्ण पंडित यांनी व्यक्त केले. फर्ग्युसन महाविद्यालयातील झूलॉजी असोसिएशन फोरमचे उद्घाटन डॉ. पंडित यांच्या हस्ते झाले.
डॉ. पंडित म्हणाले, ‘‘वनस्पतीशास्त्र, प्राणीशास्त्र, सूक्ष्मजीवशास्त्र, जैवतंत्रज्ञान आदी विषयांमध्ये संशोधनाच्या आणि रोजगाराच्या केवळ भारतात नाही तर परदेशातही संधी आहेत. संशोधन करण्याची जिज्ञासा आणि कष्ट करण्याची तयारी तुम्हाला संशोधक बनवू शकते. संशोधक बनून तो विद्यार्थी समाजातील विविध प्रश्न शास्त्रीय पद्धतीने सोडवू शकतो. यातून पर्यायाने समाजाची आणि देशाची सेवा करण्यासाठी संधी मिळते. तसेच जैववैद्यकीय आणि कृषी संशोधन क्षेत्रांमध्येदेखील संशोधनासाठी विशेष संधी उपलब्ध आहेत.’’ या वेळी प्राचार्य डॉ. नितीन कुलकर्णी आदी उपस्थित होते.