स. प. महाविद्यालयाच्या वसतिगृहात वीज मीटरला आग

पुणे, ता. ७ : सर परशुरामभाऊ महाविद्यालयातील वसतिगृहात वीज मीटरला आग लागल्याची घटना रविवारी (ता. ७) सकाळी घडली. अग्निशमन दलाचे जवान तसेच महाविद्यालयातील कर्मचाऱ्यांच्या तत्परतेमुळे त्वरित आग आटोक्यात आली. आग लागल्याची घटना उघडकीस आल्यानंतर महाविद्यालयाच्या आवारात काही वेळ गोंधळ निर्माण झाला होता.

महाविद्यालयातील मुलांच्या वसतिगृहात भिंतीच्या बाहेरील बाजूस विद्युत पुरवठ्यासाठी वापरात असलेल्या मीटरने पेट घेतल्याने ही आग लागल्याची शक्यता आहे. वीज मीटरने पेट घेतल्याने मोठा आवाज झाला होता. आग लागल्याची माहिती मिळताच वसतिगृहातील कर्मचाऱ्यांनी तातडीने अग्निरोधक उपकरणांचा वापर केला. महाविद्यालयातील कर्मचाऱ्यांनी अग्निशमन दल आणि महावितरणला या घटनेची माहिती दिली. अग्निशमन दलाच्या जवानांनी घटनास्थळी धाव घेऊन आग आटोक्यात आणली. महावितरणच्या पर्वती विभागाचे कर्मचारी घटनास्थळी दाखल झाले. त्यांनी वीज मीटरची तसेच विद्युत यंत्रणेची पाहणी केली. सुदैवाने या घटनेत कोणीही जखमी झाले नाही. अग्निशमन दलाच्या जनता वसाहत केंद्रातील जवान सागर देवकुळे, महेंद्र सकपाळ, उमेश शिंदे, सागर पाटील, विजय वाघमारे यांनी आग आटोक्यात आणली.

दरम्यान, अग्निशमन दलाकडून शहरातील महाविद्यालय, मॉल, शाळा आणि रुग्णालयांच्या परिसरात आग लागल्यास करायच्या उपाययोजना, अग्निरोधक उपकरणांच्या वापराबाबत माहितीपर व्याख्यान तसेच प्रात्यक्षिकांचे नियमित आयोजन केले जाते. या जनजागृतीमुळे गंभीर स्वरूपाच्या घटना रोखण्यास मदत झाली आहे.