रोषणाई, आतषबाजी करताना वीजसुरक्षेबाबत दक्षता घ्यावी

पुणे, ता. ३१ : दिवाळी सणाच्या कालावधीत विद्युत सजावट, रोषणाई तसेच फटाक्यांची आतषबाजी करताना वीजसुरक्षेची काळजी घेणे आवश्यक आहे. सार्वजनिक वीजयंत्रणेसोबतच घरगुती विद्युत रोषणाईच्या उपकरणांपासून सतर्क राहावे, असे आवाहन महावितरणने केले आहे.

महावितरणची वीज यंत्रणा ही सार्वजनिक ठिकाणी आहे. यात उच्च व लघुदाबाच्या वीजवाहिन्या, रोहित्र, फिडर पिलर आदी यंत्रणा उघड्यावर असल्याने फटाके फोडताना त्यापासून सुरक्षित अंतर ठेवावे. फटाक्यांच्या आतषबाजीत सार्वजनिक वीजयंत्रणेला आगीचा धोका निर्माण होणार नाही, याची काळजी घ्यावी. रोहित्र, फ्यूज पेट्या, फिडर पिलरजवळ फटाके फोडू नयेत किंवा त्या ठिकाणी कोणत्याही प्रकारचा कचरा टाकू नये अथवा तो जाळू नये. वीजवाहिन्यांना स्पर्श होईल किंवा धोका निर्माण होईल, असे रॉकेटसारखे फटाके वाहिन्यांखाली उडवू नयेत. वीजयंत्रणेला आग लागल्यास, वीजपुरवठा खंडित झाल्यास महावितरणच्या २४ तास सुरू असणाऱ्या कॉल सेंटरच्या १८००-२१२-३४३५ किंवा १८००-२३३-३४३५ किंवा १९१२ या टोल फ्री क्रमांकावर संपर्क साधावा, असे आवाहनही महावितरणकडून करण्यात आले आहे.

घराच्या किंवा इमारतीच्या रोषणाईसाठी दिव्यांची विद्युत माळ चांगल्या दर्जाची असल्याची खात्री करून घ्यावी. घराबाहेर आकाश कंदील लावताना तुटलेल्या वायरचा वापर टाळावा किंवा तुटलेली वायर चिकटपट्टीने सुरक्षित करून घ्यावी. विद्युत माळेपासून सुरक्षित अंतरावर तेलाचे दिवे लावावेत. गॅलरीमधील लोखंडी जाळी किंवा घराचा लोखंडी जिना किंवा इतर कोणत्याही लोखंडी वस्तूंपासून विद्युत दिव्यांची व आकाश कंदीलाची वायर दूर ठेवावी, असे आवाहन महावितरणने केले आहे.