पुण्यासह पिंपरीत घरफोड्या करणाऱ्या गुन्हेगारास अटक

पुणे, ता. १ : शहरात घरफोड्या करणाऱ्या एका सराईत गुन्हेगारास पोलिसांनी वानवडी परिसरातून अटक केली. गुन्हे शाखेच्या युनिट सहाच्या पथकाने ही कारवाई केली.
पापासिंग दयालसिंग दुधानी (वय ५०, रा. पेरणे, हडपसर) असे अटक केलेल्याचे नाव आहे. त्याच्याविरुद्ध पुणे, पिंपरी-चिंचवडसह इतर पोलिस ठाण्यांत १२ घरफोडीचे गुन्हे दाखल आहेत. त्याच्यावर यापूर्वी महाराष्ट्र संघटित गुन्हेगारी प्रतिबंधक (मोका) कायद्यान्वयेही कारवाई करण्यात आली आहे.
पोलिसांनी दिलेल्या माहितीनुसार, विधानसभा निवडणुकीच्या पार्श्वभूमीवर शहरात प्रतिबंधात्मक कारवाई करण्यात येत आहे. युनिट सहाचे पोलिस निरीक्षक वाहिद पठाण, सहाय्यक निरीक्षक मदन कांबळे, अंमलदार बाळासाहेब सकटे, नितीन मुंढे आणि सुहास तांबेकर ३० ऑक्टोबरला रात्री गस्तीवर होते. त्यावेळी बी. टी. कवडे रस्ता परिसरात दुधानी आल्याची माहिती मुंढे यांना मिळाली. त्यावरून या पथकाने दुधानीला ताब्यात घेतले. पुढील तपासासाठी त्याला हडपसर पोलिसांच्या ताब्यात दिले आहे.