मोबाईल फोटोंचे उद्यापासून प्रदर्शन

पुणे, ता. २३ ः प्रवासात वाट्याला आलेले सुंदर क्षण मोबाइलमध्ये कैद करणे, ते इतरांसोबत शेअर करणे हा आनंद निराळाच. प्रवासात अथवा पर्यटन स्थळी गेल्यानंतर छायाचित्रकारांनी काढलेल्या निवडक छायाचित्रांचे प्रदर्शन ‘घुमंतू २५’चे आयोजन करण्यात आले आहे. २५ ते २७ मार्चदरम्यान बालगंधर्व येथे हे प्रदर्शन आयोजित केल्याची माहिती डॉ. रामदास महाजन यांनी पत्रकार परिषदेत दिली. प्रदर्शनाचे उद्‍घाटन मंगळवारी (ता. २५) सकाळी ११ वाजता प्रदर्शनातील सहभागी छायाचित्रकारांच्या हस्ते होणार आहे. या प्रदर्शनात ३५ छायाचित्रकारांची निवडक १२४ छायाचित्रे मांडण्यात आली आहेत. सकाळी ११ ते रात्री ८ या वेळेत हे प्रदर्शन सर्वांसाठी मोफत उपलब्ध आहे. या वेळी शशांक मेहेंदळे, शैली मेहेंदळे आदी उपस्थित होते.