घोळक्याने थांबून कारवाई ; वाहतूक पोलिसांनाच दंड

पुणे, ता. २८ : टिळक रस्त्यावरील वेगवेगळ्या चौकात वाहतूक नियमनाची जबाबदारी सोपविण्यात आली असताना पुरम चौकात एकत्र थांबून घोळक्याने कारवाई करणाऱ्या वाहतूक शाखेतील तीन पोलिस कर्मचाऱ्यांना दीड हजार रुपये दंडाची शिक्षा सुनावण्यात आली आहे. वाहतूक शाखेचे पोलिस उपायुक्त हिंमत जाधव यांनी याबाबतचे आदेश दिले.
पोलिस हवालदार संतोष यादव, पोलिस शिपाई बालाजी पवार, मोनिका करंजकर-लांघे अशी शिक्षा झालेल्यांची नावे आहेत. हे तिघे खडक वाहतूक विभागात नियुक्तीस होते. १५ मे या दिवशी संतोष यादव यांना स. प. महाविद्यालय चौक, पवार यांना हिराबाग चौक आणि करंजकर यांना भावे चौक येथे वाहतूक नियमनाची जबाबदारी सोपविण्यात आली होती, मात्र नियमनाचे काम सोडून तिघे जण टिळक रस्त्यावरील पुरम चौकात आले. तेथे वाहतूक नियमन न करता, वाहने थांबविताना आढळून आले होते.

खुलासा अंशतः समाधानकारक आढळला
वाहतूक कोंडीच्या वेळी वाहतूक नियमन करणे, कोंडी होऊ न देणे अशा प्रकारच्या सूचना देण्यात आल्या आहेत. तिघांनी त्याकडे दुर्लक्ष केले होते. त्यांच्याविषयी तक्रार आल्याने वाहतूक पोलिस उपायुक्त अमोल तांबे यांनी तिघांना निलंबित केले होते. कर्तव्यातील कसुरीबद्दल त्यांना पाच हजार रुपये दंडाची शिक्षा करण्याबाबत कारणे दाखविण्याची नोटीस दिली होती. त्यावर त्यांनी दिलेला खुलासा अंशतः समाधानकारक आढळला. त्यामुळे त्यांच्या शिक्षेत बदल करून त्यांना दीड हजार रुपये दंडाची शिक्षा जाधव यांनी सुनावली.

४३ निलंबित कर्मचारी पुन्हा सेवेत
पुणे शहर पोलिस दलातील अधिकारी, कर्मचाऱ्यांना कर्तव्यात कसूर केल्याबद्दल सेवेतून निलंबित केले होते. त्यांच्या निलंबनाबाबतचा आढावा नुकत्याच झालेल्या बैठकीत घेण्यात आला असून, ४३ पोलिस कर्मचाऱ्यांना पुन्हा सेवेत घेण्याचा निर्णय घेण्यात आला आहे.