दि रोझ सोसायटी ऑफ पुणेतर्फे शनिवारपासून गुलाबपुष्प प्रदर्शन

पुणे, ता. १० : दि रोझ सोसायटी ऑफ पुणेतर्फे आयोजित १११वे गुलाबपुष्प प्रदर्शन शनिवार (ता. १३) आणि रविवार (ता. १४) टिळक रस्त्यावरील टिळक स्मारक मंदिर येथे होणार आहे. शनिवार दुपारी १ ते रात्री ८ आणि रविवार सकाळी ९ ते रात्री ८ या वेळेत हे प्रदर्शन सर्वांसाठी खुले असेल.
प्रदर्शनाचे उद्‍घाटन व ‘विजय पोकर्णा सन्मान सुवर्णपदक’ प्रदान समारंभ शनिवारी दुपारी तीन वाजता वर्ल्ड फेडरेशन ऑफ रोझ सोसायटीचे उपाध्यक्ष (सेंट्रल एशिया) डॉ. नरेंद्र ददलानी यांच्या हस्ते होणार आहे. यावेळी सोसायटीतर्फे देण्यात येणारा पुंडलिक निम्हण प्रायोजित ‘गुणवंत गुलाब शेतकरी पुरस्कार’ प्रदान होणार आहे. तसेच बक्षीस वितरण सोसायटीचे माजी अध्यक्ष रवींद्र भिडे यांच्या हस्ते रविवारी संध्याकाळी सहा वाजता होईल.

हे लक्षात ठेवा
- प्रदर्शनात पुष्परचना व फुलांसह एकूण ७६ विभाग असून प्रत्येक विभागात पहिले व दुसरे बक्षीसे
- रसिकांना विविध प्रकारचे भारतीय गुलाब पाहण्यास मिळतील
- बागकामासाठी लागणारी रोपे, खत, बियाणे, कुंड्या, औषधे तसेच अवजारे विक्रीसाठी उपलब्ध