अघोरी विधी करून तरुणीची फसवणूक

पुणे, ता. १० : मंदिरात मंत्रोच्चार आणि अघोरी विधी करून एकाने तरुणीचे सव्वातीन लाखांचे दागिने घेऊन फसवणूक केल्याचा प्रकार समोर आला आहे. पुणे-सातारा रस्त्यावरील बालाजीनगर परिसरात हा प्रकार घडला.
याबाबत एका तरुणीने (वय २६) फिर्याद दिली आहे. त्यावरून महाराष्ट्र नरबळी आणि इतर अमानुष अनिष्ट व अघोरी प्रथा व जादूटोणा अधिनियमानुसार सहकारनगर पोलिस ठाण्यात मंगळवारी (ता. ९) गुन्हा दाखल करण्यात आला आहे. गिरीश बलभीम सुरवसे (वय ३६, रा. शास्त्री चौक, भोसरी) असे गुन्हा दाखल झालेल्या संशयिताचे नाव आहे.
पोलिसांनी दिलेल्या माहितीनुसार, सुरवसे याने तरुणीचा विश्वास संपादन करून तिला मंदिरात नेले. त्या ठिकाणी मंत्रोच्चार आणि अघोरी विधी करून पेढ्यात अंगारा मिसळून खाण्यास दिला. त्याच्या मोबदल्यात त्याने तरुणीकडून पैसे आणि दागिने घेऊन फसवणूक केली, असे तरुणीने फिर्यादीत म्हटले आहे.