निधी न देण्याची नवी राजकीय संस्कृती ः सुळे

पुणे, ता. १० ः ‘‘विरोधकांना सत्ताधारी पक्षाइतकाच निधी देण्याची परंपरा आम्ही सत्तेत असताना जपली. मात्र राज्यात परिस्थिती वेगळी आहे. केंद्रात तरी विरोधकांना अद्याप किमान निधी दिला जात आहे. निधी नसेल तर तसे आम्हाला सांगितले जाते. मात्र, राज्यात विरोधकांना निधीसाठी डावलले जात असून, ही नवीन राजकीय संस्कृती आली आहे,’’ अशी टीका खासदार सुप्रिया सुळे यांनी गुरुवारी केली.
पुणे जिल्हा परिषदेच्या माध्यमातून सुरू असलेल्या कामांचा आढावा सुळे यांनी घेतला. त्यानंतर झालेल्या पत्रकार परिषदेत त्या बोलत होत्या. जलजीवनची अर्धवट कामे, पाणी, शाळा, कचरा या विषयावर बैठकीत चर्चा झाल्याचे सुळे यांनी सांगितले. जिल्हा परिषदेच्या विविध कामांची माहिती मुख्य कार्यकारी अधिकारी गजानन पाटील यांनी बैठकीमध्ये दिली. भारत-पाकिस्तान यांच्यात होणाऱ्या क्रिकेट सामन्यावर टीका करताना सुळे म्हणाल्या, ‘‘ऑपरेशन सिंदूरच्या वेळी पाकिस्तानच्या दहशतवादी कारवाईच्या वेळी आमचा पक्ष सरकारच्या पाठीशी उभा राहिला. दहशतवाद मोडून काढण्याची भाषा त्यावेळी करण्यात आली होती. मात्र, आता थेट पाकिस्तानबरोबर क्रिकेटचा सामना होणार आहे. हे कसे काय?’’ राज्यातील आर्थिक स्थितीवर बोलताना त्या म्हणाल्या, ‘‘मुख्यमंत्री माझी लाडकी बहीण योजना सुरू करण्यात आली. पहिल्या टप्प्यात २६ लाख महिलांना या योजनेतून बाहेर काढण्यात आले आहे. केवळ सवंग लोकप्रियता मिळविण्यासाठीचा हा प्रयोग सुरू आहे.’’

आम्हाला अडचण नाही...
‘‘समविचारी पक्षाशी, विचारधारा जुळणाऱ्या पक्षासोबत जाण्यास काहीच हरकत नाही. महाराष्‍ट्र नवनिर्माण सेनेचे प्रमुख राज ठाकरे हे महाविकास आघाडीत येत असतील, तर त्‍यांचे स्‍वागत आहे. काँग्रेस, राष्ट्रवादी आणि आम्ही अनेकदा स्वतंत्र लढलो आहोत. त्‍यामुळे ठाकरे यांच्याबाबत आम्हाला काही अडचण नाही,’’ असेही सुळे यांनी स्पष्ट केले.