नेपाळमधून परतीचा प्रवास सुरू

पुणे, ता. ११ ः समाज माध्यमांवर घातलेल्या बंदीमुळे नेपाळमध्ये निर्माण झालेली परिस्थिती आता काहीशी शांत होत आहे. त्यामुळे येथील विमानसेवा सुरू झाली आहे. आम्ही शुक्रवारी (ता. १२) परत मायदेशी येणार आहेत. त्यासाठीचे बुकिंग देखील झाले आहे, अशी माहिती नेपाळमध्ये अडकलेल्या काही पर्यटकांनी दिली.
नेपाळमधील पोखरा येथे एका रिसॉर्टमध्ये अडकलेले पुण्यातील पर्यटक भूषण महाजन यांनी सांगितले की, आम्ही तीन सप्टेंबरला नेपाळमध्ये पोचलो. त्यानंतर पर्यटन करत आम्ही शेवटी पोखरा शहराबाहेर असलेल्या एका रिसॉर्टमध्ये थांबलो आहोत. मंगळवारी पर्यटनासाठी बाहेर पडलो असता आम्हाला आंदोलनकर्त्यांनी अडविले. त्यामुळे आम्ही पुन्हा आमच्या रिसॉर्टवर आलो आहोत. त्या व्यतिरिक्त आम्हाला काही वाईट अनुभव आला नाही. आम्ही भारतीय दूतावासाला फोन करत आमची माहिती दिली. त्यांनी देखील आमच्या सुरक्षेची काळजी घेतली.

रस्त्याने गोरखपुरला जाण्याचा विचार
महाजन यांच्यासह अनेक पर्यंटक नेपाळमध्ये अडकले आहेत. परत येण्यासाठी विमानसेवा बंद झाल्याने त्यातील अनेकांनी रस्त्याने गोरखपूरला येण्याचा विचार केला होता. याबाबत भारतीय दुतावासमध्ये चर्चा देखील करण्यात आली. मात्र रस्त्याने गोरखपूरला येणे सुरक्षित नसल्याचे त्यांना सांगण्यात आले. त्यामुळे त्यांनी आहे तेथेच थांबून सर्व सुरळीत झाल्यानंतर विमानाने भारतात येण्याचे ठरवले आहे.

काठमांडू, दिल्ली, त्यानंतर इच्छित स्थळी
नेपाळमधून इतर देशांत जाण्यासाठी प्रामुख्याने काठमांडू विमानतळावरून विमानांचे उड्डाण होणार आहे. तेथून दिल्ली आणि त्यानंतर राज्यातील विविध ठिकाणी पर्यटक जाणार आहेत. त्यानुसार त्यांचे बुकिंग झाले आहे.

नेपाळमधील आंदोलन चिघळल्यानंतर आम्ही आमच्या सदस्यांना आव्हान केले होते की, त्यांनी त्यांच्या पर्यटकांची योग्य सोय करावी. त्यानुसार सर्वांची सुरक्षित सोय करण्यात आली आहे. वैयक्तिकरित्या पर्यटनासाठी गेलेल्या पर्यटकांची संख्या देखील मोठी आहे. त्यातील कोणाची गैरसोय होत आहे किंवा त्यांना तेथे सुरक्षित वाटत नाही, असे काही प्रकार घडल्याचे अद्याप कोणी कळविलेले नाही. आम्ही देखील तेथील स्थानिक पर्यटन संस्थांशी संपर्कात असून पर्यटकांना सुरक्षेच्या दृष्टीने आवश्यक ती खबरदारी घेतली जात आहे.
- नीलेश भन्साळी, अध्यक्ष, ट्रॅव्हल एजन्सीज असोसिएशन ऑफ पुणे