शिक्षा भोगून आल्यानंतर गांजाची तस्करी

पुणे, ता. ६ ः महाराष्ट्र संघटित गुन्हेगारी नियंत्रण कायद्यान्वये (मकोका) केलेल्या कारवाईत शिक्षा भोगून कारागृहाबाहेर आलेल्या सराईताला गांजा तस्करी प्रकरणात अमली पदार्थ विरोधी पथकाने अटक केली आहे. त्याच्याकडून पाच लाख ३६ हजार रुपयांचा २६ किलो गांजा, मोटार आणि मोबाईल असा २१ लाख १६ हजार रुपयांचा मुद्देमाल जप्त करण्यात आला आहे.
अनिल ऊर्फ अण्णा सुभाष राख (वय ४६, रा. काळेपडळ, हडपसर) असे अटक आरोपीचे नाव आहे. त्यावर अमली पदार्थ विरोधी कायद्यान्वये फुरसुंगी पोलिस ठाण्यात गुन्हा दाखल करण्यात आला आहे. राख हा सराईत गुन्हेगार आहे. हडपसर भागातील खून प्रकरणात २०१४ मध्ये त्याच्यावर ‘मकोका’नुसार कारवाई करण्यात आली होती. या प्रकरणात त्याला शिक्षा झाली होती. शिक्षा भोगून तो कारागृहातून सहा ते सात महिन्यांपूर्वी बाहेर आला होता. कारागृहातून बाहेर आल्यानंतर त्याने गांजाची तस्करी सुरू केल्याची माहिती अमली पदार्थ विरोधी पथकाचे वरिष्ठ पोलिस निरीक्षक प्रशांत अन्नछत्रे यांनी दिली.
राख हा कात्रज-मंतरवाडी रस्त्यावर मोटारीतून आला होता. त्याच्याकडे गांजा असल्याची माहिती तपास पथकाला मिळाली. त्यानंतर पोलिसांच्या पथकाने सापळा लावून त्याला पकडले. मोटारीतून २६ किलो गांजा जप्त करण्यात आला. राखने गांजा कोणाकडून आणला, तसेच तो कोणाला विक्री करणार होता, यादृष्टीने तपास करण्यात येत आहे. पोलिस निरीक्षक प्रशांत अन्नछत्रे, सहाय्यक निरीक्षक अनिल सुरवसे, प्रवीण उत्तेकर, विनायक साळवे, विशाल दळवी, सचिन माळवे, नागेश राख, संदीप शिर्के, सुहास डोंगरे, दत्ताराम जाधव, दयानंद तेलंगे-पाटील आणि पथकाने ही कारवाई केली.