काँग्रेस प्रवक्ते तिवारी यांच्यासह पाच जणांवर गुन्हा

पुणे, ता. ६ ः नारायण पेठेतील हाणामारी प्रकरणात काँग्रेसचे प्रवक्ते गोपाळ तिवारी यांच्यासह पाच जणांविरुद्ध विश्रामबाग पोलिस ठाण्यात गुन्हा दाखल करण्यात आला. फलक लावण्यावरुन झालेल्या वादातून मंगळवारी रात्री नारायण पेठेतील केळकर रस्त्यावर ही घटना घडली. या प्रकरणी दोन्ही गटांकडून परस्परविरोधी फिर्यादी दाखल करण्यात आली आहे.

याबाबत स्वप्नील ऊर्फ बाबा रामचंद्र मोरे (वय ३४, रा. नारायण पेठ) याने विश्रामबाग पोलिस ठाण्यात फिर्याद दिली आहे. त्याने दिलेल्या फिर्यादीनुसार, गोपाळ शंकर तिवारी (वय ६६, रा. घोले रस्ता, शिवाजीनगर), हर्ष ऊर्फ नन्या शंकर शिर्के (वय २९, रा. नारायण पेठ), निखिल दीपक जगताप (वय ३३, रा. शनिवार पेठ), मुकुंद शंकर शिर्के (वय २७, रा. नारायण पेठ), अभिषेक उमेश थोरात (वय २२, रा. दत्तवाडी) यांच्यावर खुनाचा प्रयत्न केल्याप्रकरणी गुन्हा दाखल करण्यात आला आहे. या प्रकरणात शिर्के, जगताप, थोरात यांना अटक करण्यात आली आहे.

पोलिसांनी दिलेल्या माहितीनुसार, फिर्यादी स्वप्नील मोरे हा नारायण पेठेतील केळकर रस्ता परिसरात असलेल्या एका मंडळाचा पदाधिकारी आहे. मंडळाच्या कार्यकर्त्यांनी मुरलीधर हॉटेलसमोरील रस्त्यावर फलक लावला होता. मोरेला हा फलक काढण्यास सांगण्यात आले होते. मंगळवारी रात्री तिवारी यांच्यासह शिर्के, जगताप तेथे गेले. त्यांनी फलक काढण्यास सुरुवात केली. तेव्हा मोरेने फलक काढण्यास विरोध केला. या कारणावरून आरोपी हर्ष शिर्के याने मोरेला मारहाण करत पाठीवर कोयत्याने वार केला. निखिल याने गजाने मारहाण केली, असे मोरे याने दिलेल्या फिर्यादीत नमूद आहे.

या घटनेची माहिती मिळताच वरिष्ठ पोलिस निरीक्षक संतोष पांढरे यांनी घटनास्थळी भेट दिली. मोरे याच्यावर खासगी रुग्णालयात उपचार सुरू आहेत. या प्रकरणी मुकुंद शिर्के याने विश्रामबाग पोलिस ठाण्यात परस्परविरोधी फिर्याद दिली आहे. स्वप्नील मोरे आणि त्याच्याबरोबर असलेल्या साथीदारांनी भाऊ हर्ष याला गजाने मारहाण केली. मित्र निखिल याला बेदम मारहाण केली. आरोपींनी दगड फेकून मारले, असे शिर्के याने दिलेल्या परस्परविरोधी फिर्यादीत नमूद आहे.
----------------------
नारायण पेठेतील मुरलीधर हॉटेलसमोर फलक लावण्याच्या वादातून मारहाणीची घटना घडली. या प्रकरणी पोलिसांकडे परस्पर विरोधी फिर्यादी देण्यात आल्या आहेत. त्यानुसार गुन्हे दाखल करण्यात आले आहेत.
- संतोष पांढरे,वरिष्ठ पोलिस निरीक्षक, विश्रामबाग पोलिस ठाणे