स्लॅब कोसळून दोन मजूर जखमी

पुणे, ता. १९ ः हॉटेलच्या नूतनीकरणाचे काम सुरू असताना स्लॅब कोसळून दोन मजूर गंभीर जखमी झाल्याची घटना बुधवारी ढोले-पाटील रस्त्यावर घडली. स्लॅबच्या राडारोड्याखाली अडकलेल्या मजुरांना अग्निशमन दलाच्या जवानांनी तातडीने खासगी रुग्णालयात दाखल केले.
पुणे स्टेशन परिसरातील ढोले-पाटील रस्त्यावर एका हॉटेलच्या नूतनीकरणाचे काम सुरू आहे. काम सुरू असताना अचानक स्लॅब कोसळला. स्लॅबजवळ काम करणारे दोन मजूर राडारोड्याखाली अडकले. या घटनेची माहिती मिळताच अग्निशमन दलाचे तीन बंब घटनास्थळी दाखल झाले. राडारोड्याखाली अडकलेल्या दोन मजुरांना तातडीने बाहेर काढण्यात आले. या घटनेची माहिती मिळताच पोलिसांनी घटनास्थळी भेट दिली. दुर्घटनेत गंभीर जखमी झालेल्या दोन मजुरांवर खासगी रुग्णालयात उपचार सुरू असल्याची माहिती बंडगार्डन पोलिसांनी दिली.