प्रशांत व गौर दामले यांना यशवंत-वेणू पुरस्कार

पुणे, ता. २१ : अखिल भारतीय मराठी नाट्य परिषद, कोथरूड शाखेचा वर्धापन दिन, यशवंतराव चव्हाण नाट्यगृहाचा रौप्यमहोत्सव आणि यशवंतराव चव्हाण यांच्या स्मृतिदिनानिमित्त देण्यात येणारा यशवंत-वेणू पुरस्कार यंदा ज्येष्ठ अभिनेते प्रशांत दामले आणि गौर दामले यांना जाहीर झाला आहे. तसेच ज्येष्ठ अभिनेते दिलीप प्रभावळकर यांना जीवनगौरव पुरस्काराने सन्मानित करण्यात येणार आहे.
कोथरूड येथील यशवंतराव चव्हाण नाट्यगृहात मंगळवारी (ता. २५) सायंकाळी ४.३० वाजता पुरस्कार वितरण होणार आहे, अशी माहिती नाट्य परिषदेच्या कोथरूड शाखेचे अध्यक्ष सुनील महाजन यांनी पत्रकार परिषदेत दिली. हा कार्यक्रम सर्वांसाठी खुला आहे. ‘कुटुंब कीर्तन’ या नाटकाला सर्वोत्कृष्ट नाटक, तर ‘ठकीशी संवाद’ला सर्वोत्कृष्ट प्रायोगिक नाटक त्यासोबतच ‘दोन वाजून बावीस मिनिटांनी’ला विशेष लक्षवेधी नाटक हा पुरस्कार जाहीर झाला आहे. संदेश कुलकर्णी यांना सर्वोत्कृष्ट लेखक, विजय केंकरे यांना सर्वोत्कृष्ट दिग्दर्शक, तर संकर्षण कऱ्हाडे यांना सर्वोत्कृष्ट अभिनेता, शुभांगी गोखले हिला सर्वोत्कृष्ट अभिनेत्री आणि दत्ता शिंदे यांना पडद्यामागील कलाकार हा पुरस्कार प्रदान केला जाणार आहे. या कार्यक्रमात ‘धुंदी कळ्यांनो, धुंदी फुलांनो’ हा गीतांचा कार्यक्रम होणार असून अजित परब आणि मनिषा निश्चल हे गीते सादर करतील.