‘आम्ही सावित्रीच्या मायलेकी’ संमेलनाच्या अध्यक्षपदी संगीता झिंजुरके

पुणे, ता. १४ : संविधानदिनानिमित्त २५ नोव्हेंबरला होणाऱ्या ‘आम्ही सावित्रीच्या मायलेकी’ या महाकाव्य संमेलनाच्या अध्यक्षपदी ज्येष्ठ कवयित्री संगीता झिंजुरके यांची निवड झाली आहे, तर स्वागताध्यक्षपदी निवेदिका, कवयित्री सीमा गांधी असणार आहेत. यासोबतच संमेलनामध्ये होणाऱ्या ‘सावित्रीची काव्यफुले’ या काव्य महोत्सवाच्या अध्यक्षपदी कवयित्री प्रिया माळी यांची निवड करण्यात आली आहे, अशी माहिती विश्वबंधुता साहित्य परिषदे‌चे संस्थापक अध्यक्ष बंधुताचार्य प्रकाश रोकडे यांनी दिली.
विश्वबंधुता मूल्यसंवर्धन समिती, काषाय प्रकाशन आणि बंधुता प्रकाशन या संस्थांमार्फत संमेलनाचे आयोजन केले आहे. झिंजुरके यांनी पाचव्या विश्वबंधुता काव्य महोत्सवाचे अध्यक्षपद भूषविले आहे. संमेलनाम‌ध्ये शंभराहून अधिक महिलांचा सहभाग राहणार असून, नियोजनामध्ये काषाय प्रकाशनच्या पौर्णिमा वानखेडे, बंधुता प्रकाशनच्या मंदाकिनी रोकडे आणि विश्वबंधुता मूल्यसंवर्धन समितीच्या अध्यक्षा प्रा. भारती जाधव यांनी विशेष पुढाकार घेतल्याचे रोकडे यांनी नमूद केले.