‘द रिअल जंगल बुक’ माहितीपटातून उलगडले निसर्गाचे अंतरंग

पुणे, ता. १४ : वाघ, बिबट्या, अस्वल, लांडगे असे निसर्गातील प्राणी, त्यांची सद्यःस्थिती, कमी होणारा अधिवास, या परिस्थितीशी जुळवून घेण्यासाठी प्राण्यांनी केलेले बदल आशा अनेक गोष्टींचे मार्मिक दर्शन घडविणाऱ्या ‘द रिअल जंगल बुक’ या माहितीपटाचे सादरीकरण रविवारी पुण्यात करण्यात आले. निसर्गातील विविध घटकांची वैशिष्ट्ये या पुरस्कारप्राप्त माहितीपटातून दाखवण्यात आली आहेत.
‘सकाळ माध्यम समूह’ आणि ‘नेचर वॉक चॅरिटेबल ट्रस्ट’ आयोजित वर्षभर चालणाऱ्या वाइल्ड इंडिया’ या कार्यक्रम मालिकेतील दुसऱ्या कार्यक्रमांतर्गत या उपक्रमाचे आयोजन केले होते. ‘द ग्रासलँड ट्रस्ट’ हे या माहितीपटाच्या निर्मितीचे सहकारी आहेत. याप्रसंगी संस्थेचे मिहीर गोडबोले, सर्वोच्च न्यायालयाच्या केंद्रीय सशक्तीकरण समितीचे सदस्य सुनील लिमये, डेक्कन एज्युकेशन सोसायटीचे माजी अध्यक्ष विकास काकतकर, ‘जी टेक’चे प्रभाकर गोखले, नेचर वॉकचे विश्वस्त चंद्रसेन शिरोळे आदी उपस्थित होते.
वाइल्ड इंडिया’ मालिका सर्वसामान्य नागरिकांमध्ये निसर्ग संरक्षणाचे आणि संवर्धनाचे महत्त्व पटवून देण्याच्या उद्दिष्टाने सुरू करण्यात आली असून दर महिन्यात एका कार्यक्रमाचे आयोजन मालिकेअंतर्गत करण्यात येणार आहे. ही मालिका दिवंगत कीर्ती प्रभाकर गोखले आणि दिवंगत सदाशिव गोपाळ गोखले यांच्या स्मृतीप्रित्यर्थ ‘जी टेक’ संस्थेने प्रायोजित केली आहे. तसेच, ‘मोडगी हेरिटेज डिझाईन्स’ यांचे या मालिकेला विशेष सहकार्य लाभले आहे. ही कार्यक्रम मालिका सर्वांसाठी विनामूल्य खुली आहे. जास्तीत जास्त निसर्गप्रेमींनी या कार्यक्रमांचा आस्वाद घ्यावा, असे आवाहन आयोजकांनी केले आहे. ‘नेचर वॉक’च्या दीप्ती खरे यांनी सूत्रसंचालन केले.