दहावी-बारावी परीक्षा अर्जासाठी ३० सप्टेंबरपर्यंत मुदतवाढ

पुणे, ता. १५ : महाराष्ट्र राज्य माध्यमिक व उच्च माध्यमिक शिक्षण मंडळामार्फत घेण्यात येणाऱ्या दहावी आणि बारावीच्या परीक्षेसाठी विद्यार्थ्यांना खासगीरीत्या फॉर्म नंबर १७ भरून परीक्षा देण्याची सुविधा उपलब्ध आहे. या अंतर्गत दहावी-बारावीच्या परीक्षेसाठी खासगी विद्यार्थी नावनोंदणी अर्ज (फॉर्म नंबर १७) नियमित शुल्कासह भरण्यासाठी ३० सप्टेंबरपर्यंत मुदतवाढ देण्यात आली आहे.
राज्य मंडळाच्या ‘http://www.mahahsscboard.in’ या संकेतस्थळावर याबाबत सर्व माहिती आणि मार्गदर्शक पुस्तिका प्रसिद्ध करण्यात आली आहे. फेब्रुवारी-मार्च २०२६ मध्ये होणाऱ्या दहावी-बारावीच्या परीक्षेसाठी विद्यार्थ्यांना अर्ज करता येणार आहे. विद्यार्थ्यांनी नावनोंदणी अर्ज व शुल्क ऑनलाइन भरून मूळ अर्ज, ऑनलाइन नावनोंदणी शुल्क जमा केल्याबाबत पोहोचपावतीच्या दोन छायाप्रती आणि मूळ कागदपत्रे अर्जावर नमूद केलेल्या शाळेत किंवा कनिष्ठ महाविद्यालयात जमा करावेत, असे राज्य मंडळाने प्रकटनाद्वारे स्पष्ट केले आहे.
खासगी विद्यार्थ्यांना इयत्ता दहावी आणि बारावीसाठी नावनोंदणी अर्ज ऑनलाइन पद्धतीनेच भरायचे आहेत. त्यामुळे कोणाचाही ऑफलाइन अर्ज स्वीकारला जाणार नाही. विद्यार्थ्यांनी अर्ज भरण्यासाठी शाळा सोडल्याचा दाखला, आधार कार्ड, स्वतःचे पासपोर्ट आकारातील छायाचित्र स्वतःजवळ ठेवा. ऑनलाइन अर्ज भरताना संबंधित कागदपत्रे स्कॅन करून अपलोड करायची आहेत.
पात्र विद्यार्थ्यांना नावनोंदणी प्रमाणपत्र ऑनलाइन देण्यात येतील. तसेच पात्र विद्यार्थ्यांना नावनोंदणी प्रमाणपत्र प्राप्त झाल्यानंतर त्यांनी परीक्षेचे अर्ज मंडळाने दिलेल्या कालावधीत परीक्षा शुल्कासह भरणे आवश्यक आहे. अर्ज भरल्यानंतर संबंधित विद्यार्थ्यांनी छाननीसाठी दिलेली मूळ कागदपत्रे संबंधित माध्यमिक शाळा, कनिष्ठ महाविद्यालयाकडून परत घेऊन जाण्याची दक्षता घ्यावी, अशी सूचना राज्य मंडळाने दिली आहे.