कलाकेंद्रांना ‘डान्‍स बार’ होण्‍यापासून वाचवा

पुणे, ता. १६ : महाराष्‍ट्रात जवळपास ८० लोककला केंद्रे आहेत. त्‍यापैकी निम्म्‍या कलाकेंद्रांमध्‍ये पारंपरिक वाद्यांऐवजी ‘डीजे’चा वापर करून अश्‍लील नृत्याला प्रोत्साहन दिले जात आहे, तसेच काही ठिकाणी गैरप्रकारही होत आहेत. त्यामुळे खऱ्या लोककलावंतांची बदनामी होत असून, त्‍यांच्‍यावर उपासमारीची वेळ आली आहे. थोडक्‍यात काही कलाकेंद्रे छुप्‍या पद्धतीने ‘मिनी डान्‍स बार’ होऊ पाहत असून, सुरू असलेल्या गैरप्रकारांवर बंदी आणावी, अशी मागणी राज्यस्तरीय अखिल महाराष्ट्र लोकनाट्य सांस्कृतिक कलाकार संघटना व अखिल महाराष्‍ट्र तमाशा थिएटर मालक असोसिएशनने पत्रकार परिषदेत केली.
या वेळी महाराष्ट्र तमाशा थिएटर्सचे अध्यक्ष डॉ. अशोक जाधव, महाराष्ट्र तमाशा कलावंतांचे अध्यक्ष चंद्रकांत लाखे, लावणी सम्राज्ञी रेश्मा परितेकर, जय अंबिका कलाकेंद्राच्या संचालिका सुरेखा पवार यांसह मोठ्या संख्‍येने कलाकार उपस्थित होते.
लाखे म्हणाले, ‘‘राज्‍यात संगीतबारीची जी कलाकेंद्रे आहेत, त्या केंद्रांत पारंपरिक वाद्यांचा वापर करून नृत्‍यकला सादर केली जाते. पारंपरिक कला म्हणून अनेक पिढ्यांनी ही कला जोपासली आहे. भातू कोल्हाटी, कोल्हाटी आणि कळवात यांनी पारंपरिक लावणी ही कला जोपासली. या लोककला जोपासणाऱ्यांमध्ये पद्मश्री यमुनाबाई वाईकर, कौसल्याबाई कोपरगावकर, बिजली जेजुरकर, हौसा मंजुळा कोल्हापूरकर अशी अनेक नावे सांगता येतील, परंतु गेल्या काही दिवसांपासून सांस्कृतिक केंद्रांमध्ये गैरप्रकार सुरू असल्याने सरसकट सर्वच कलाकेंद्रे बदनाम होत आहेत.’’
डॉ. जाधव म्‍हणाले, ‘‘डीजेचा वापर करणारी कलाकेंद्रे ही जामखेड, धाराशिव, मराठवाडा, साबळेवाडी, नारायणगाव येथील आहेत. दिवंगत गृहमंत्री आर. आर. पाटील यांनी ‘डान्‍स बार’वर बंदी आणली. मात्र, आता तेच ‘डान्‍स बार’ छुप्‍या पद्धतीने या कलाकेंद्रांत सुरू होऊ पाहत आहेत. त्‍यांच्‍यावर संबंधित पोलिस ठाणी, जिल्‍हाधिकाऱ्यांनी कारवाई करावी, परंतु ते कारवाई करत नाहीत.’’
परितेकर म्‍हणाल्‍या, ‘‘दहा दहा तास आम्‍ही सराव करून आमची पारंपरिक कला सादर करतो. त्‍यामुळे आम्‍ही अकलूज लावणी महोत्‍सवात प्रथम क्रमांक मिळवला. आम्‍ही देश-विदेशात आमच्‍या कला सादर करतो, परंतु अनेक कलाकेंद्रे ही संस्‍कृती मोडू पाहत आहेत. ते डीजेवर नृत्‍य सादर करून पारंपरिक कला संपवीत आहेत. त्‍यामुळे खऱ्या कलावंतांवर उपासमारीची वेळ आली आहे.’’