गणेशोत्सवात रिक्षा चोरणाऱ्यास अटक

पुणे, ता. १८ : गणेशोत्सवातील गर्दीचा फायदा घेत शनिवारवाडा परिसरातून रिक्षा चोरणाऱ्या एका सराईत चोरट्याला विश्रामबाग पोलिसांनी अटक केली. पोलिसांनी चोरीस गेलेली ७५ हजार रुपये किमतीची रिक्षा जप्त केली आहे.
विश्रामबाग पोलिस ठाण्यात फिर्यादी यांनी दिलेल्या तक्रारीनुसार, एक सप्टेंबर रोजी मध्यरात्री शनिवारवाड्याजवळ पदपथालगत त्यांनी आपली रिक्षा लॉक करून पार्क केली होती. मात्र, चोरट्याने संधी साधून रिक्षा पळवली. या घटनेवरून पोलिसांनी भारतीय न्याय संहिता कलम ३०३ (२) अंतर्गत गुन्हा दाखल केला आहे.
वरिष्ठ पोलिस निरीक्षक विजयमाला पवार यांच्या मार्गदर्शनाखाली सहाय्यक निरीक्षक राजेश उसगावकर यांच्या पथकाला तपास सोपविण्यात आला. तपासात पोलिस अंमलदार राहुल मोरे यांनी तांत्रिक विश्लेषणाच्या आधारे सिद्धाराम तुकाराम शिंदे (वय ३०, रा. ससाणेनगर, हडपसर, मूळ रा. दक्षिण सोलापूर) याने रिक्षा चोरी केल्याचे निष्पन्न केले. पथकाने शिंदेला बाजीराव रस्त्यावरून ताब्यात घेतले असता, त्याच्याकडून चोरीस गेलेली काळ्या-पिवळ्या रंगाची रिक्षा जप्त करण्यात आली.
वरिष्ठ पोलिस निरीक्षक विजयमाला पवार, पोलिस निरीक्षक (गुन्हे) अरुण घोडके यांच्या मार्गदर्शनाखाली सहाय्यक निरीक्षक राजेश उसगावकर, अंमलदार गणेश काठे, अमोल भोसले, राहुल मोरे, आशिष खरात, अनिष शेख, अर्जुन थोरात, नितीन बाबर, सागर मोरे आणि शिवा गायकवाड यांनी ही कारवाई केली.