वाहतूक अडथळ्यांच्या कारणांचा अहवाल सादर करा - आयुक्तांचा आदेश

पुणे, ता. १८ ः शहरातील रस्त्यांवर वाहतूक कोंडी का होत आहे? याची कारणे शोधून, त्याचा अहवाल सोमवारपर्यंत (ता. २२) सादर करण्याचे आदेश महापालिका आयुक्त नवलकिशोर राम यांनी महापालिका प्रशासनाला दिले आहेत. अतिक्रमणे, खड्डे, अवैध बांधकाम या प्रश्‍नांकडे अधिकारी दुर्लक्ष करत असतात, आता त्यांच्याकडून अहवालात नेमकी काय कारणे दिली जाणार आहेत, याची उत्सुकता लागली आहे.
पुणे शहरातील वाहतुकीचा वेग मंदावलेला आहे. दहा किलोमीटर अंतर जाण्यासाठी ३३ मिनिटांचा वेळ लागत आहे. वाहतूक कोंडीत पुण्याचा जगात चौथा क्रमांक लागत आहे. वाहतूक कोंडीचा पुणेकरांच्या जीवनमानावर वाईट परिणाम होत आहे. त्यामुळे गेल्या काही महिन्यांपासून वाहतुकीचा वेग वाढविण्यासाठी महापालिका, वाहतूक पोलिसांचे प्रयत्न सुरू आहेत. मात्र, अजून त्यात फारशी सुधारणा झालेली नाही.
शहरातील रस्त्यांना पडलेले खड्डे, ओबडधोबड पॅचवर्क यामुळे वाहतुकीला अडथळा होत आहे. त्याचप्रमाणे प्रमुख रस्त्यांवर हातगाडे, पथारी, स्टॉलची अतिक्रमणे, पादचारी मार्गावर झालेली अतिक्रमणे, अवैध बांधकामांमुळे वाहतुकीला अडथळा निर्माण होत आहे, पण त्यावर जुजबी कारवाई केली जाते. कारवाईनंतर पुन्हा अतिक्रमणे थाटली जात असल्याने वाहतूक कोंडीचा प्रश्‍न सुटू शकलेला नाही.
पुण्यात जानेवारी महिन्यात जागतिक स्तरावरील सायकल स्पर्धा होणार आहे. हा सायकल मार्ग शहराच्या विविध विभागांतून जात असताना त्यांचे डांबरीकरण व सुशोभीकरण करण्यावर सुमारे १४५ कोटी रुपये खर्च होणार आहेत. असे असताना शहरातील अन्य रस्त्यांची स्थितीही सुधारणे आवश्‍यक आहे.
शहरातील प्रमुख ३२ रस्ते आणि २२ चौक या ठिकाणी वाहतूक कोंडी का होते, याची कारणे शोधण्याचे आदेश आयुक्तांनी आज बैठकीत दिले आहेत. यामध्ये पथ विभाग, बांधकाम विभाग, क्षेत्रीय कार्यालय, परिमंडळ कार्यालय, अतिक्रमण विभाग, विद्युत विभाग, आकाशचिन्ह या विभागांमधील अधिकारी, अभियंत्यांना अहवाल सादर करण्यास सांगितले आहे. त्यावर सोमवारी ही माहिती संकलित झाल्यानंतर पुढच्या बैठकीत त्यावर चर्चा करून पुढील निर्णय होणार आहे.