वाघजाई देवीच्या घटस्थापनेने कोथरूड नवरात्रोत्सवाला प्रारंभ

पुणे, ता. २१ : शारदीय नवरात्रोत्सवानिमित्त कोथरूडच्या भेलकेवाडी येथील गणेशकृपा सोसायटीसमोर कोथरूड नवरात्र महोत्सवाचे आयोजन करण्यात आले आहे. वाघजाई देवीच्या घटस्थापनेने महोत्सवाला सुरुवात होणार असल्याची माहिती उत्सवाचे संयोजक आणि क्रिएटिव्ह फाउंडेशनचे अध्यक्ष संदीप खर्डेकर, विश्वनाथ भेलके प्रतिष्ठानचे अध्यक्ष विशाल भेलके आणि उमेश भेलके यांनी दिली.
यंदा देखील महोत्सवात विविध सांस्कृतिक कार्यक्रम होणार आहेत. शुक्रवारी (ता. २६) रात्री ९ वाजता यशवंतराव चव्हाण नाट्यगृहात जितेंद्र भुरूक यांचा सांगीतिक कार्यक्रम होणार आहे. शनिवारी (ता. २७) ज्येष्ठ अभिनेते प्रशांत दामले यांची प्रमुख भूमिका असणारे ‘शिकायलो गेलो एक’ हे नाटक सादर होणार असून रविवारी (ता. २८) पूनम कुडाळकर आणि सहकाऱ्यांचा ‘तुमच्यासाठी काय पण’ हा लावण्यांचा कार्यक्रम होणार आहे. यासह विविध संस्थांना आवश्यक साहित्याची भेट, रास दांडिया, बाल जत्रा आदी विविध कार्यक्रम महोत्सवात होणार असल्याचे मंजुश्री खर्डेकर व श्वेताली भेलके यांनी सांगितले. महोत्सवात सादर होणाऱ्या कार्यक्रमांना विनामूल्य प्रवेश आहे; मात्र प्रवेशिका आवश्यक आहेत.