डॉ. हेमा साने अनंतात विलीन

पुणे, ता. २२ ः ज्येष्ठ वनस्पतितज्ज्ञ डॉ. हेमा साने सोमवारी अनंतात विलीन झाल्या. त्यांच्या पार्थिवावर वैकुंठ स्मशानभूमीत शोकाकुल वातावरणात अंत्यसंस्कार करण्यात आले. या वेळी त्यांच्या आप्तेष्टांसह विद्यार्थी उपस्थित होते.
डॉ. साने यांचे शुक्रवारी (ता. १९) वृद्धापकाळाने राहत्या घरी पहाटे निधन झाले होते. त्यांचे आप्तजन परदेशातून आल्यानंतर सोमवारी अंत्यसंस्कार करण्यात आले. वनस्पतिशास्त्रातील चालताबोलता ‘ज्ञानकोश’ अशी डॉ. साने यांची ओळख होती. पर्यावरणाचा अभ्यास करायचा म्हणजे खऱ्या अर्थाने निसर्गाशी एकरूप होऊन राहायला हवे, म्हणून डॉ. साने यांनी तशीच जीवनशैली आयुष्यभर अंगीकारली होती. विजेशिवाय आपण राहू शकतो, हे त्यांनी स्वतःच्या जगण्यातून दाखवून दिले. वनस्पतिशास्त्र आणि पर्यावरण विषयासह इतिहास, प्राच्यविद्या अशा विषयांवर जवळपास तीसहून अधिक पुस्तके त्यांनी लिहिली आहेत.