नवरात्रात ४३ गुन्हेगारांची थेट कारागृहात रवानगी

पुणे, ता. २२ : नवरात्रोत्सवात कायदा व सुव्यवस्था राखण्यासाठी पोलिसांनी सराईत गुन्हेगारांवर धडक कारवाई सुरू केली आहे. परिमंडळ एकमधील ४३ सराईत गुन्हेगारांविरुद्ध प्रतिबंधात्मक कारवाई करून त्यांची थेट कारागृहात रवानगी करण्यात आली.
पोलिस आयुक्त अमितेश कुमार, पोलिस सहआयुक्त रंजनकुमार शर्मा, अतिरिक्त पोलिस आयुक्त राजेश बनसोडे आणि परिमंडळ एकचे पोलिस उपायुक्त कृषिकेश रावले यांच्या मार्गदर्शनाखाली ही कारवाई करण्यात आली. परिमंडळ एकच्या हद्दीत खडक, समर्थ, फरासखाना, विश्रामबाग, शिवाजीनगर आणि डेक्कन या पोलिस ठाण्यांच्या हद्दीतील ४३ गुन्हेगारांविरुद्ध बेकायदा शस्त्रसाठा, दारूविक्री, खुनाचा प्रयत्न अशा गंभीर स्वरूपाच्या गुन्ह्यांची नोंद आहे. त्यांचा काही सराईत गुंड टोळ्यांशी संबंध असल्याची माहिती रावले यांनी दिली.