राहुल गांधी यांना न्यायालयात बोलाविण्याच्या अर्जाला हरकत

पुणे, ता. २४ : लोकसभेतील विरोधी पक्षनेते खासदार राहुल गांधी यांच्या विरोधात दाखल बदनामीच्या खटल्यात त्यांना प्रत्यक्ष न्यायालयात हजर राहण्याचे आदेश द्यावेत, अशी मागणी फिर्यादी सात्यकी सावरकर यांनी विशेष एमपी-एमएलए न्यायालयात केली होती. मात्र राहुल गांधींच्या वतीने वकील अ‍ॅड. मिलिंद पवार यांनी या अर्जाला तीव्र हरकत घेत ‘ही मागणी कायद्याच्या दृष्टीने चुकीची, आधारहीन व ग्राह्य न धरता येण्याजोगी आहे,’ असे स्पष्ट केले.
अ‍ॅड. पवार यांनी न्यायालयात सादर केलेल्या युक्तिवादात म्हटले आहे की, ‘‘फिर्यादीच्या अर्जात राहुल गांधींनी न्यायालयात हजर का राहावे, याचे कोणतेही ठोस कायदेशीर कारण मांडलेले नाही. फिर्यादींनी आपला अर्ज कोणत्या कायद्यांतर्गत दाखल केला आहे, हे प्रथम स्पष्ट करणे आवश्यक आहे. त्यानंतरच गांधींच्या वतीने तपशीलवार उत्तर दिले जाईल. त्यामुळे अशा प्रकारचा अर्ज स्वीकारणे म्हणजे कायद्याच्या मूलभूत तत्त्वांना विरोध करणे ठरेल.’’
ते म्हणाले, ‘‘काही जण देशभरात राहुल गांधी यांच्या विरोधात खोटे, राजकीय हेतूपासून प्रेरित खटले दाखल करत आहेत. ही बाब केविलवाणीच नव्हे तर लोकशाहीसाठी धोकादायक आहे.’’ या प्रकरणाची पुढील सुनावणी तीन ऑक्टोबरला होणार आहे.