गुलटेकडी, लोणी काळभोरसह वानवडीत चोरट्यांचा धुमाकूळ

पुणे, ता. २३ : शहर आणि उपनगरांत चोरट्यांनी पुन्हा धुमाकूळ घातला आहे. गुलटेकडी, लोणी काळभोर आणि वानवडी भागात घरफोडीच्या घटनांमध्ये सोन्याचे दागिने आणि रोकड चोरट्यांनी लंपास केली. गुलटेकडीतील क्रिसेंट हायस्कूलजवळ श्रीकृष्ण अपार्टमेंटमधील बंद सदनिकेचे कुलूप तोडून चोरट्यांनी कपाटातील एक लाख २२ हजार रुपयांचे सोन्याचे दागिने लांबविले. याप्रकरणी स्वारगेट पोलिस ठाण्यात गुन्हा दाखल झाला आहे. पोलिस उपनिरीक्षक बी. पी. शिरसाट तपास करीत आहेत. लोणी काळभोरमधील कदमवाक वस्ती येथील प्रथमेश अपार्टमेंटमधील बंद सदनिकेत चोरट्यांनी हात साफ केला. कपाटात ठेवलेली ३० हजार रुपयांची रोकड आणि सोन्याचे दागिने असा एक लाख ६४ हजार रुपयांचा ऐवज लांबविला. याबाबत २९ वर्षीय तरुणाने फिर्याद दिली आहे. त्यानुसार लोणी काळभोर पोलिसांनी गुन्हा दाखल केला. पोलिस उपनिरीक्षक योगेश पैठणे तपास करीत आहेत. दरम्यान, वानवडी येथील फातिमानगरमधील हिमालया इमारतीमधील एका दवाखान्याचा दरवाजा उचकटून चोरट्यांनी आत प्रवेश केला. केबिनची काच फोडून आठ हजार रुपयांची रोकड चोरून नेली. याप्रकरणी डॉक्टरांनी वानवडी पोलिस ठाण्यात तक्रार दिली असून, पोलिस हवालदार रजपूत तपास करीत आहेत.