अल्पवयीन मुलीवर अत्याचार करणाऱ्यास सश्रम कारावास

पुणे, ता. २४ : शिकवणीसाठी घरी आलेल्या अल्पवयीन मुलीवर अत्याचार करणाऱ्या आरोपीस विशेष न्यायालयाने २० वर्षांची सश्रम कारावासाची शिक्षा ठोठावली, तसेच ३७ हजार रुपयांचा दंड आणि दंड न भरल्यास नऊ महिने अतिरिक्त सश्रम कारावासाची शिक्षा सुनावली.
संजय रमेश शर्मा (वय ५६) असे शिक्षा सुनावलेल्या आरोपीचे नाव आहे. अल्पवयीन मुलगी (वय १४) ही आरोपी संजयच्या घरी शिकवणीसाठी आली होती. त्या वेळी आरोपी हा मुलीला आणि तिच्या बहिणीला जिवे मारण्याची धमकी देऊन तिच्यावर अत्याचार करत होता. हा प्रकार तीन ऑगस्ट २०२१ ते २९ ऑक्टोबर २०२१ या कालावधीत घडला. याबाबत मुलीच्या आईने फिर्याद दिल्यानंतर वानवडी पोलिस ठाण्यात गुन्हा नोंदविण्यात आला होता.
पोलिस उपनिरीक्षक सुधा चौधरी यांनी या गुन्ह्याचा तपास करून आरोपीविरुद्ध मुदतीत दोषारोपपत्र दाखल केले. या खटल्यात सबळ पुरावे आणि साक्षीदार मांडल्यानंतर न्यायालयाने आरोपीस बाल लैंगिक अत्याचार प्रतिबंधक (पोक्सो) कायद्यान्वये शिक्षा सुनावली. सरकारी पक्षाची बाजू सरकारी वकील नितीन कोंघे यांनी मांडली, तर कोर्ट पैरवी पोलिस हवालदार दिनेश जाधव यांनी केली. या उत्कृष्ट कामगिरीबद्दल परिमंडळ पाचचे पोलिस उपायुक्त डॉ. राजकुमार शिंदे यांनी तपासी अधिकारी सुधा चौधरी आणि कोर्ट पैरवी अधिकारी जाधव यांना दहा हजार रुपयांचे बक्षीस जाहीर केले.