‘ससून’मध्ये रुग्णाची उडी मारून आत्महत्या

पुणे, ता. २५ : रेल्वे अपघातात जखमी झाल्याने रुग्णालयात दाखल केलेल्या २५ वर्षीय रुग्णाने उपचारादरम्यान ११ मजली इमारतीतून उडी मारून आत्महत्या केल्याचा प्रकार मंगळवारी (ता. २३) पहाटे घडला. या रुग्णाचा मृतदेह इमारतीच्या मागे आढळून आला.
वरिष्ठ पोलिस निरीक्षक संतोष पांढरे यांनी दिलेल्या माहितीनुसार, मृताचे नाव विजय (वय २५) असे आहे. तो पाच सप्टेंबर रोजी दुपारी रेल्वेतून पडून गंभीर जखमी झाला होता. पुणे रेल्वे पोलिसांनी त्याला ससून रुग्णालयात दाखल केले. उजव्या पायाला मोठी जखम झाल्याने त्याच्यावर शस्त्रक्रिया करून औषधोपचार सुरू करण्यात आले होते. उपचारादरम्यान तो डॉक्टर व नर्सिंग स्टाफशी असहकार दर्शवत होता. यामुळे मानसोपचार विभागाचा सल्ला घेण्यात आला होता.
मंगळवारी पहाटे पावणेसहाला औषध देण्यासाठी नर्स वॉर्डमध्ये गेल्या असता, रुग्ण आढळला नाही. तातडीने याची माहिती ड्यूटीवर असलेल्या वैद्यकीय अधिकारी डॉ. मयूर यांना देण्यात आली. शोध घेतल्यानंतर रुग्णालयाच्या ११ मजली इमारतीच्या मागे रुग्णाचा मृतदेह आढळला. या प्रकरणी पोलिसांनी अकस्मात मृत्यूची नोंद केली असून, चौकशी करण्यात येत आहे.
-----