‘एआयएसएसएमएस’तर्फे विशेष स्वसंरक्षण प्रशिक्षण

पुणे, ता. २९ ः नवरात्रीनिमित्त अखिल भारतीय श्री शिवाजी मेमोरिअल सोसायटीच्या (एआयएसएसएमएस) शिवाजीनगर येथील अभियांत्रिकी महाविद्यालयात विद्यार्थिनींसाठी विशेष स्वसंरक्षण प्रशिक्षण सत्र आयोजित करण्यात आले आहे.
हा उपक्रम सहा महिन्यांचा असणार आहे. यामध्ये विद्यार्थिनींना आत्मरक्षणाची मूलभूत कौशल्य आणि धोका ओळखण्याचे तंत्र शिकविले जाणार आहे. तसेच प्रत्यक्ष प्रशिक्षणाबरोबर आत्मविश्वास वाढवण्यासाठी मानसिक बळकटीकरणावरही भर दिला जाणार आहे. या उपक्रमाचे नेतृत्व आशुतोष शिंदे करणार असून, प्रमुख प्रशिक्षक म्हणून लतेन्द्र भिंगारे मार्गदर्शन करणार आहेत. या उपक्रमाची संकल्पना ‘एआयएसएसएमएस’ सचिव मालोजीराजे छत्रपती यांनी मांडली आहे. तसेच महाविद्यालयाचे प्राचार्य डॉ. दत्तात्रेय बोरमने, प्रथम वर्ष अभियांत्रिकी विभाग प्रमुख डॉ. भानुदास बच्छाव, जिमखान्याचे उपाध्यक्ष अभिजित भोसले आणि डॉ. मनीषा कोंढरे यांच्या पुढाकाराने महाविद्यालयात या विशेष स्वसंरक्षण प्रशिक्षण सत्राचे आयोजन करण्यात आले आहे.