पुणे पीपल्स बॅंकेतर्फे १५ टक्के लाभांश

पुणे, ता. २९ ः पुणे पीपल्स को-ऑपरेटिव्ह बँक लि.च्या ७४व्या वार्षिक सर्वसाधारण सभेत सभासदांना १५ टक्के लाभांश जाहीर करण्यात आला. बँकेचे अध्यक्ष जनार्दन रणदिवे यांच्या अध्यक्षतेखाली झालेल्या सभेत हा निर्णय जाहीर करण्यात आला.
३१ मार्च २०२५ रोजी संपलेल्या आर्थिक वर्षात बँकेने एकूण २७०६ कोटी रुपयांचा व्यवसाय केला असून, त्यात १६३३ कोटी ठेवी व १०७३ कोटी रुपयांच्या कर्जाचा समावेश आहे. बँकेचा निव्वळ नफा १७.४६ कोटी असून, एनपीए शून्य टक्के असल्याची माहिती अध्यक्ष रणदिवे यांनी दिली. त्यांनी मार्च २०२६ अखेर २० कोटींचा निव्वळ नफा साध्य होईल, असा विश्वास व्यक्त केला. तसेच सासवड व शिक्रापूर येथे शाखा सुरू करण्यासाठी प्रस्ताव रिझर्व्ह बँकेस सादर करण्यात येणार असल्याचे सांगितले.
सभेत समाजकारण, शिक्षण, उद्योग, क्रीडा क्षेत्रात उल्लेखनीय योगदान देणाऱ्या सभासद, ठेवीदार, सेवक व त्यांच्या पाल्यांचा सत्कार करण्यात आला. तसेच पूरग्रस्तांना मदतीसाठी संचालकांचा सभा भत्ता व सेवकांचा एक दिवसाचा पगार देण्याचा निर्णय घेण्यात आला. गेल्या ७४ वर्षांपासून यशस्वीपणे वाटचाल करणारी ही मल्टिस्टेट बँक सध्या २३ शाखांमधून विविध आधुनिक सुविधा पुरवते. शेड्यूल्ड बँक दर्जा व इंटरनेट बँकिंग सुरू करणे ही आगामी उद्दिष्टे असल्याचे ज्येष्ठ संचालक अॅड. सुभाष मोहिते यांनी नमूद केले. सभेचे सूत्रसंचालन मुख्य कार्यकारी अधिकारी संजय भोंडवे यांनी केले.