सराईत गुन्हेगाराला बिबवेवाडीत अटक

पुणे, ता. २९ ः बेकायदा देशी गावठी कट्टा आणि जिवंत काडतूस बाळगणाऱ्या सराईत गुन्हेगाराला बिबवेवाडी पोलिसांनी अटक केली आहे. त्याच्याकडून ५० हजारांचा शस्त्रसाठा जप्त करण्यात आला आहे.
अतुल सुनील चव्हाण (वय २६, रा. आईमाता मंदिरापाठीमागे, बिबवेवाडी) असे अटक केलेल्या आरोपीचे नाव आहे.

बिबवेवाडी पोलिसांचे तपास पथक २६ सप्टेंबरला हद्दीत पेट्रोलिंग करीत होते. त्या वेळी पोलिस अंमलदार सुमीत ताकपेरे, विशाल जाधव यांना बिबवेवाडीत एक जण कमरेला पिस्तूल खोचून उभा असल्याची माहिती मिळाली. त्यानुसार वरिष्ठ पोलिस निरीक्षक अश्विनी सातपुते यांच्या मार्गदर्शनाखाली पथकाने घटनास्थळी धाव घेऊन चव्हाण याला ताब्यात घेतले. न्यायालयाच्या आदेशाने त्याची येरवडा कारागृहात रवानगी करण्यात आली आहे.