ओला दुष्काळ जाहीर करा

पुणे, ता. २९ : अतिवृष्टीने शेतीचे मोठ्या प्रमाणात नुकसान झाले आहे. त्याचबरोबर जनावरे आणि मनुष्यहानी लक्षात घेता, पुरोगामी पक्ष संघटनांच्या वतीने केंद्र व राज्य सरकारविरोधी आंदोलन तात्पुरते स्थगित केले आहे. मात्र, येत्या २ ऑक्टोबरला महात्मा गांधी जयंतीच्या दिवशी सकाळी दहा ते दुपारी एक या वेळेत पुणे रेल्वे स्थानक परिसरातील महात्मा गांधी यांच्या पुतळ्याजवळ ओला दुष्काळ जाहीर करण्याच्या मागणीसाठी ज्येष्ठ सामाजिक कार्यकर्ते डॉ. बाबा आढाव बसणार आहेत.
महाराष्ट्रात ओला दुष्काळ जाहीर करण्याच्या मागणीसह अतिवृष्टीमुळे बाधित झालेल्यांना मदत करण्याचे आवाहन समिती करणार आहे. या वेळी ‘राष्ट्रीय एकात्मता समिती’च्या नावाचे धनादेश डॉ. आढाव स्वीकारणार असल्याचे समितीने सांगितले. याविषयी आढाव यांच्या अध्यक्षतेखाली सोमवारी बैठक झाली. या बैठकीस समितीचे निमंत्रक नितीन पवार, महात्मा फुले समता प्रतिष्ठानच्या सरचिटणीस शारदा वाडेकर, जन आंदोलन राष्ट्रीय समन्वयाच्या सुनीती सु. र., इब्राहिम खान, समाजवादी पक्षाचे दत्ता पाकिरे, काँग्रेसचे ॲड. संदीप ताम्हनकर, कागद काच पत्रा कष्टकरी पंचायतीचे योगेश मंजुळा, स्वच्छ संस्थेचे हर्ष बर्डे, राष्ट्र सेवा दलाचे संदेश दिवेकर, भारतीय कम्युनिस्ट पक्षाचे अरविंद जक्का, बांधकाम मजदूर सभेचे अध्यक्ष ॲड. मोहन वाडेकर, हमाल पंचायतीचे सरचिटणीस गोरख मेंगडे, पथारी व्यावसायिक पंचायतीचे सचिव मोहन चिंचकर, अंगणवाडी कर्मचारी सभेच्या शकुंतला घोरपडे आदी विविध संस्था-संघटनांचे पदाधिकारी उपस्थित होते.