प्रांजल खेवलकरने ड्रग्ज सेवन न केल्याचे उघड

पुणे, ता. १ : खराडीतील एका हॉटेलमध्ये झालेल्या कथित अमली पदार्थ पार्टी प्रकरणात आरोपी डॉ. प्रांजल खेवलकरने ड्रग्ज सेवन केले नसल्याचे न्यायवैद्यक अहवालातून समोर आले आहे. शहर पोलिस दलातील वरिष्ठ अधिकाऱ्यांनी त्याला दुजोरा दिला आहे.
गुन्हे शाखेच्या अमली पदार्थ विरोधी पथकाने २७ जुलैला कथित अमली पदार्थ पार्टीवर छापा टाकला होता. त्यात माजी मंत्री एकनाथ खडसे यांचा जावई डॉ. प्रांजल खेवलकर याच्यासह सात जणांना अटक करण्यात आली होती. आरोपींमध्ये दोन महिलांचाही समावेश होता. या कारवाईत आरोपींकडून २.७० ग्रॅम कोकेनसदृश पदार्थ, ७० ग्रॅम गांजा, हुक्का सेट, मद्याच्या बाटल्या, दोन वाहने असा मुद्देमाल जप्त केला होता. पोलिस कोठडीत प्राथमिक चौकशी झाल्यानंतर न्यायालयाने आरोपींची न्यायालयीन कोठडीत रवानगी केली होती. त्यानंतर डॉ. खेवलकरने न्यायालयात जामिनासाठी अर्ज केला. विशेष न्यायालयाने सरकारी आणि बचाव पक्षाच्या युक्तिवादानंतर खेवलकरला जामीन मंजूर केला होता. त्यानंतर हा न्यायवैद्यक अहवाल समोर आला आहे.