महाराष्ट्र कल्चरल सेंटरतर्फे सुदर्शन संगीत महोत्सव

पुणे, ता. ३ ः महाराष्ट्र कल्चरल सेंटरतर्फे येत्या शुक्रवारपासून (ता. १०) रविवारपर्यंत (ता. १२) सुदर्शन संगीत महोत्सवांचे आयोजन करण्यात आले आहे. या महोत्सवातील तीनही दिवस शनिवार पेठेतील सुदर्शन रंगमंच येथे दररोज सायंकाळी ६.३० वाजता तीन वैविध्यपूर्ण प्रस्तुतींचे सादरीकरण होणार आहे.
शुक्रवारी (ता. १०) ‘वाद्यसंगीत मैफील’मध्ये मानस गोसावी आणि सौमित्र क्षीरसागर यांचे अनुक्रमे मोहनवीणा आणि संवादिनी या वाद्यांचे एकल वादन होईल. शनिवारी (ता. ११) जयमाला शिलेदार यांच्या जन्मशताब्दीच्या औचित्याने ‘स्वरमाला जयमाला’ ही जयमाला शिलेदारांच्या स्वररचनांची विशेष मैफल सादर होईल. रविवारी (ता. १२) ‘साज ठुमरीचा’ ही मराठी भाषेतील ठुमरी-दादरा शैलीतील अभिनव रचनांची मैफल सादर होणार आहे. अनुराधा कुबेर आणि हृषिकेश बडवे हे या रचना सादर करणार आहे. या महोत्सवाला रसिकांना विनामूल्य प्रवेश आहे.