पुणे शहरातील उकाड्यात वाढ कमाल तापमान ३१ अंश सेल्सिअसच्या वर

पुणे, ता. ३ : शहरातील उकाड्यात लक्षणीय वाढ झाली असून, शहराचे कमाल तापमान ३१ अंश सेल्सिअसच्या वर पोहोचले आहे. गेल्या काही दिवसांपासून पावसाने विश्रांती घेतली आहे. परिणामी पुणेकरांना उकाड्याचा सामना करावा लागत आहे. मात्र, पुढील दोन दिवसांत तापमानात घट होऊन अतिहलक्या पावसाची शक्यता भारतीय हवामानशास्त्र विभागाने वर्तविली आहे.

पुणे आणि उपनगर परिसरात शुक्रवारी सकाळी ढगाळ वातावरण होते, तर दुपारी कडक ऊन पडले होते. परिणामी कमाल तापमानात मोठी वाढ नोंदविण्यात आली. गेल्या काही दिवसांपूर्वी नोंदविले गेलेले २४ अंश सेल्सिअस इतके कमाल तापमान शुक्रवारी ३१.४ अंश सेल्सिअसपर्यंत नोंदविण्यात आले, तसेच किमान तापमानातदेखील किंचित घट नोंदविण्यात आली आहे. २०.९ अंश सेल्सिअस इतके किमान तापमान नोंदविण्यात आले. पुढील दोन दिवसांत मात्र तापमानात घट होणार असल्याचे हवामानशास्त्र विभागाने सांगितले.

पुणे आणि परिसरात शनिवारी (ता. ४) आणि रविवारी (ता. ५) कमाल तापमानात दोन अंश सेल्सिअसने घट होणार असून, कमाल तापमान २९ अंश सेल्सिअस इतके, तर किमान तापमान २१ अंश सेल्सिअस इतके नोंदविण्यात येणार आहे. आकाश अंशतः ढगाळ राहून अतिहलक्या स्वरूपाचा पाऊस पडण्याची शक्यता आहे. सोमवारी (ता. ६) कमाल तापमानात पुन्हा वाढ होण्याची शक्यता असून, कमाल तापमान ३० अंश सेल्सिअस पर्यंत नोंदविण्यात येणार आहे. आकाश अंशतः ढगाळ राहण्याची शक्यता हवामानशास्त्र विभागाने वर्तविली आहे.