हिवाळी सत्र परीक्षेचे अर्ज करण्यासाठी मुदतवाढ

पुणे, ता. ४ : सावित्रीबाई फुले पुणे विद्यापीठाच्या वतीने शैक्षणिक वर्ष २०२५-२६ मधील हिवाळी सत्र परीक्षेच्या पहिल्या आणि दुसऱ्या टप्प्यातील परीक्षेचा अर्ज करण्यासाठी मुदतवाढ देण्यात आली आहे. त्यामुळे आता विद्यार्थ्यांना नियमित शुल्कासह मंगळवारपर्यंत (ता. ७) परीक्षेसाठी अर्ज करता येणार आहेत, अशी माहिती विद्यापीठाच्या परीक्षा व मूल्यमापन मंडळाचे प्रभारी संचालक डॉ. प्रभाकर देसाई यांनी दिली.
विद्यापीठाच्या हिवाळी सत्र परीक्षेचा अर्ज भरण्यासाठी पुरेसा कालावधी दिला असला तरीही पुणे, नाशिक आणि अहिल्यानगर जिल्ह्यातील ग्रामीण भागात अतिवृष्टीमुळे उद्‌भवलेली परिस्थिती आणि विद्यार्थ्यांचे हित लक्षात घेऊन ही अंतिम मुदतवाढ देण्यात आली आहेत. त्यानुसार, विद्यार्थ्यांना परीक्षेचे अर्ज नियमित शुल्कासह मंगळवारपर्यंत भरता येणार आहेत. महाविद्यालयाने विद्यार्थ्यांचा परीक्षा अर्ज गुरुवारपर्यंत (ता. ९) इनवर्ड करायचा आहे. विद्यार्थ्यांनी नियमित शुल्कासह परीक्षा अर्ज भरल्यानंतर परीक्षा शुल्क भरण्यासाठी ११ ऑक्टोबरपर्यंत अंतिम मुदत देण्यात आली आहे. विज्ञान आणि तंत्रज्ञान, वाणिज्य आणि व्यवस्थापन, आंतरविद्याशाखीय आणि ह्यूमॅनिटिज्‌ या विद्याशाखांमधील पदवी आणि पदव्युत्तर पदवी अभ्यासक्रमाच्या हिवाळी सत्र परीक्षेसाठी ही मुदतवाढ दिली आहे, असे डॉ. देसाई यांनी परिपत्रकाद्वारे स्पष्ट केले आहे.