पिस्तूल बाळगणाऱ्या तरुणाला अटक

पुणे, ता. २५ : पिस्तूल बाळगणाऱ्या तरुणाला विश्रामबाग पोलिसांनी नवी पेठेतील राजेंद्रनगर परिसरातून अटक केली. त्याच्याकडून देशी बनावटीची दोन पिस्तुले आणि काडतुसे जप्त केली आहेत.
मयूर सचिन भोसले (वय २०, रा. पापळवस्ती, गणपतनगर, बिबवेवाडी) असे अटक केलेल्याचे नाव आहे. विश्रामबाग पोलिस ठाण्याच्या तपास पथकातील कर्मचारी गस्त घालत होते. त्यावेळी राजेंद्रनगर भागात भोसले थांबला होता. त्याच्याकडे पिस्तूल असल्याची माहिती पोलिस कर्मचारी आशिष खरात आणि अनिस शेख यांना मिळाली. त्यानुसार पोलिसांच्या पथकाने सापळा लावून त्याला ताब्यात घेतले. झडती घेतली असता त्याच्याकडे दोन पिस्तुले आणि काडतुसे सापडली.
भोसले याची बिबवेवाडी भागातील काहीजणांशी भांडणे झाली होती. बिबवेवाडीतील काहीजण आपल्यावर हल्ला करतील, अशी भीती त्याला वाटत होती. भीतीपोटी त्याने पिस्तूल बाळगल्याची माहिती तपासात मिळाली.