सावरकर उड्डाणपुलावरून महिनाभर अवजड वाहतूक बंद - महापालिकेतर्फे केली जाणार दुरुस्ती

पुणे, ता. २७ : पौड फाट्यावरील स्वातंत्र्यवीर विनायक दामोदर सावरकर उड्डाणपुलाच्या दुरुस्तीचे काम केले जाणार आहे. त्यामुळे या पुलावरील एक मार्गिका २६ नोव्हेंबरपर्यंत बंद राहणार आहे. या पुलावरून अवजड वाहतूक पूर्णपणे बंद केली आहे, अशी माहिती पुणे महापालिकेने दिली.
महापालिकेच्या प्रकल्प विभागामार्फत उड्डाणपुलाच्या देखभाल-दुरुस्तीचे काम सुरू करण्यात येणार आहे. त्यामुळे २७ ऑक्टोबर ते २६ नोव्हेंबर या कालावधीत या उड्डाणपुलावरील एक मार्गीका वाहतुकीसाठी बंद ठेवण्यात येणार आहे. तर दुसऱ्या मार्गिकेतून दुचाकी, मोटारी अशी हलकी वाहने सोडली जाणार आहेत. पीएमपी बस, डंपर, ट्रक अशा अवजड वाहनांसाठी हा उड्डाणपूल पूर्णपणे बंद असणार आहे.
या कामासाठी महापालिकेने यापूर्वीच वाहतूक पोलिसांकडे प्रस्ताव सादर केला होता, मात्र दिवाळीतील गर्दीच्या पार्श्वभूमीवर पोलिसांनी परवानगी पुढे ढकलली होती. ही परवानगी आज मिळाली असून, हे काम मंगळवार (ता. २८) पासून प्रत्यक्ष सुरू होणार आहे.
जड वाहनचालकांनी नळस्टॉपकडून कोथरूडकडे जाण्यासाठी पौड फाट्यावरील चौकातील इतर पर्यायी मार्गांचा वापर करावा. या काळात नागरिकांनी सहकार्य करावे, असे आवाहन प्रकल्प विभागाचे प्रमुख दिनकर गोजारे यांनी केले आहे.