माहेश्वरी फाउंडेशनतर्फे अन्नकोट महोत्सव

पुणे, ता. २८ : दरवर्षीप्रमाणे यंदाही पुणे माहेश्‍वरी समाजाच्या माहेश्‍वरी चॅरिटेबल फाउंडेशनच्या वतीने महेश सांस्कृतिक भवन येथे अन्नकोट महोत्सव उत्साहात साजरा करण्यात आला. खडकमाळ येथील ११ भट्टड परिवार आणि फाउंडेशन यांच्या संयुक्त विद्यमाने अन्नकोटचे आयोजन केले होते. महोत्सवासाठी सजवलेल्या रथावर जगन्नाथ, बलराम आणि सुभद्रा यांची मूर्ती स्थापित करण्यात आल्या होत्या. भट्टड परिवाराने मिरवणूक काढून हा रथ मुख्य मंचापर्यंत नेला. त्यानंतर पदाधिकाऱ्यांनी मूर्तींची विधिवत स्थापना केली. मूर्ती स्थापनेनंतर पूजा आणि आरती केली. या सोहळ्यात राधा-कृष्णचे देखावे सादर करण्यात आले. तसेच साडेतीन हजार पुणेकरांनी महाप्रसादाचा लाभ घेतला. कार्यक्रमाची रुपरेषा, नियोजन आणि अंमलबजावणी यामध्ये समाजातील सर्व घटकांचे, विशेषतः महिलांचे योगदान महत्त्वपूर्ण होते.