दिवाळीत ३५ लाख रेल्वे प्रवाशांची वाहतूक

पुणे, ता. ४ : यंदाच्या दिवाळीत पुणे रेल्वे स्थानकावरून तब्बल ३५ लाख प्रवाशांनी प्रवास केला. यासाठी नियमित व विशेष रेल्वे मिळून ११०० रेल्वे धावल्या. २७ ऑक्टोबरला सर्वाधिक दोन लाख ५४ हजार प्रवाशांची वाहतूक झाली. ही अन्य दिवशीच्या प्रवासी संख्येपेक्षा ८० हजारांनी जास्त आहे. रेल्वे प्रशासनाने अतिरिक्त गाड्यांचे नियोजन करताना नियमित रेल्वेंना उशीर होणार नाही, याची विशेष काळजी घेतली.
रेल्वे मंत्रालयाने यंदा दिवाळीत देशातून सुमारे १२ हजारांपेक्षा जास्त रेल्वे सोडण्याचा निर्णय घेतला. पुणे हे देशातील महत्त्वाचे शहर असल्याने व उत्तर भारतात जाणाऱ्या प्रवाशांची संख्या अधिक असल्याने रेल्वे विभागाने अतिरिक्त रेल्वे सोडण्याचा निर्णय घेतला. त्यानुसार नियोजन करून १६ ऑक्टोबर ते २ नोव्हेंबरच्या काळात ८४१ नियमित रेल्वे व २५० विशेष रेल्वे अशा १०९१ गाड्यांची पुणे स्थानकावरून वाहतूक झाली. यात सुमारे ३५ लाख प्रवाशांनी प्रवास केला.

प्रवासी संख्येचा नवा उच्चांक
यंदा २७ ऑक्टोबरला पुणे स्थानकाहून दोन लाख ५४ हजार प्रवाशांची वाहतूक झाली. गेल्या वर्षी दिवाळीत एका दिवशीची सर्वाधिक प्रवाशांची संख्या दोन लाख १० हजार होती. यंदा ही संख्या मोडीत काढून प्रवासी संख्येचा नवा उच्चांक गाठला आहे. इतर दिवशी पुणे स्थानकाहून दैनंदिन एक लाख ७० हजार प्रवासी प्रवास करतात. दिवाळीत सामान्य दिवशीची प्रवासी वाहतूक सुमारे दोन लाख होती.

गर्दीच्या काळात प्रवाशांच्या सोयीसाठी पुणे प्रशासनाने अतिरिक्त रेल्वे गाड्यांची वाहतूक केली. यावेळी फलाटावर गर्दीचे व्यवस्थापन करण्यासाठी विशेष प्रयत्न केले. ‘वॉर रूम’मुळे गर्दीचे व्यवस्थापन करणे सोपे झाले.
- पद्मसिंह जाधव,
अतिरिक्त विभागीय रेल्वे व्यवस्थापक, पुणे