पीएसआयची येरवडा कारागृहात रवानगी

पुणे : गुन्ह्यात मदत करण्यासाठी दोन कोटी रुपयांची लाच मागणाऱ्या पिंपरी-चिंचवड पोलिस आयुक्तालयातील आर्थिक गुन्हे शाखेत कार्यरत असलेल्या लाचखोर पोलिस उपनिरीक्षकाची येरवडा कारागृहात रवानगी करण्यात आली आहे. त्याच्या पोलिस कोठडीची मुदत संपल्याने त्याला शुक्रवारी (ता. ७) न्यायालयात हजर करण्यात आले

. प्रमोद रवींद्र चिंतामणी (वय ३८, रा. गंगोत्री पार्क, भोसरी, मूळ रा. कर्जुले हरियाळ, जि. अहिल्यानगर) असे या पोलिस उपनिरीक्षकाचे नाव आहे. या प्रकरणात सरकार पक्षातर्फे अतिरिक्त सरकारी वकील अनिल कुंभार यांनी कामकाज पाहिले. चिंतामणी याने तक्रारदाराकडे दोन कोटी रुपयांची लाच मागितली होती. लाचेचा ४६ लाख ५० हजार रुपयांचा पहिला हप्ता घेताना त्याला लाचलुचपत प्रतिबंधक विभागाने (एसीबी) रंगेहात पकडले होते. रविवारी (ता. २) दुपारच्या सुमारास ही कारवाई करण्यात आली होती. या प्रकरणी समर्थ पोलिस ठाण्यात गुन्हा दाखल करण्यात आला आहे. त्यानंतर त्याच्या घरझडतीदरम्यान ५१ लाखांची रोकड सापडल्याचे पोलिसांकडून सांगण्यात आले.