धनकवडी, आंबेगाव, कोंढव्यात अनधिकृत बांधकामांवर कारवाई

पुणे, ता. ६ : धनकवडी, आंबेगाव खुर्द, कोंढवा बुद्रूक व कोंढवा खुर्द येथील अनधिकृत बांधकामांवर महापालिकेच्या बांधकाम विभागाने कारवाई केली. संबंधित ठिकाणचे २८ हजार ५०० चौरस फुटांचे अनधिकृत बांधकाम पाडण्यात आले.
धनकवडीमधील सर्व्हे क्रमांक २२ व आंबेगाव खुर्द येथील सर्व्हे क्रमांक ४१ येथील साई मंदिराच्या पाठीमागे असणाऱ्या अनधिकृत बांधकामांवर कारवाई करण्यात आली. यात १३ हजार ५०० चौरस फुटांचे पक्‍क्‍या स्वरूपाचे बांधकाम पाडण्यात आले. बांधकाम विभागाच्या परिमंडळ दोनच्या अधिकारी व कर्मचाऱ्यांनी ही कारवाई केली.
याबरोबरच कोंढवा खुर्द व कोंढवा बुद्रूक परिसरामध्येही मोठ्या प्रमाणात अनधिकृत बांधकाम केल्याचे महापालिकेच्या निदर्शनास आले होते. संबंधित अनधिकृत बांधकाम कारवाई करण्यासाठी महापालिकेकडून विशेष पथकाची नियुक्ती करण्यात आली होती. संबंधित पथकाने भाग्योदयनगर, लक्ष्मीनगर येथील १८ हजार चौरस फुटांच्या अनधिकृत बांधकामांवर कारवाई केली.