मूळ ‘ओबीसीं’ना तिकीट डावलल्यास त्या पक्षांविरोधात काम

पुणे, ता. १३ ः ‘‘आगामी नगरपंचायत निवडणुकांमध्ये ७७ नगराध्यक्षांपैकी मूळ ‘ओबीसीं’ना किती पक्ष तिकीट देत आहेत, याकडे आम्ही बारकाईने लक्ष ठेवून आहोत. जिथे एखादा पक्ष मूळ ‘ओबीसीं’चे तिकीट डावलेल, तिथे त्या-त्या पक्षाविरोधात आम्ही काम करू,’’ अशी भूमिका ‘ओबीसी’ नेते लक्ष्मण हाके यांनी गुरुवारी पत्रकार परिषदेत मांडली.

याप्रसंगी ‘ओबीसी’ नेते मंगेश ससाणे उपस्थित होते. ‘‘‘ओबीसीं’नी निवडणुकीत आपले उपद्रवमूल्य दाखवून दिले नाही, तर ज्याप्रमाणे शिक्षण आणि नोकरीतील ‘ओबीसीं’चा प्रभाव संपुष्टात आला आहे, त्याचप्रमाणे राजकारणातदेखील ओबीसींचे प्रतिनिधित्त्व संपुष्टात येईल,’’ अशी भीती हाके यांनी व्यक्त केली.

हाके म्हणाले, ‘‘‘ओबीसीं’ना डावलून बोगस कुणबी आणि धनदांडग्यांना तिकीट दिले जाणार असेल, तर मूळ ‘ओबीसीं’नी बंडखोरी करून निवडणूक लढवली पाहिजे. निवडणुकीत मूळ ‘ओबीसीं’ना तिकीट न दिलेल्यांचा ‘करेक्ट कार्यक्रम’ करणार आहोत. पंचायतराज निवडणुकीत ‘ओबीसी’ नेतृत्व तयार झाले नाही, तर आगामी विधानसभा आणि लोकसभा निवडणुकीतदेखील ‘ओबीसी’ नेतृत्व दिसून येणार नाही. ‘ओबीसीं’साठी ज्या जागा नियमानुसार राखीव आहे; त्याचे प्रमाणदेखील योग्यप्रकारे काढले जात नसल्याने राज्यात २७ हजार जागा निवडणूक आयोगाने खाल्ल्या आहेत. सर्वच पक्षांनी ‘ओबीसीं’ची फसवणूक करत शिकार केली आहे.’’