हंगामी शिक्षण सेवक पगाराविना

पुणे, ता. १७ : पुणे महानगरपालिकेच्या शिक्षण विभागाने सप्टेंबर २०२५ मध्ये जवळपास २५० हंगामी शिक्षण सेवकांची नियुक्ती केली. परंतु, दोन महिने उलटून गेले तरी अद्याप या शिक्षण सेवकांना पगार देण्यात आलेला नाही. परिणामी, शिक्षण सेवकांवर पगाराविना शिक्षण सेवा करण्याची वेळ आली आहे.
महापालिकेच्या या हंगामी शिक्षण सेवक भरतीमध्ये मराठी माध्यमातील जवळपास २०० आणि इंग्रजी माध्यमातील ५० हंगामी शिक्षण सेवकांचा यात समावेश आहे. या शिक्षण सेवकांना सहा महिन्यांच्या करार तत्त्वावर दरमहा वीस हजार रुपये या मानधनावर नियुक्त केले आहे.
‘‘ज्ञानदानाचे पवित्र कार्य करणारे हे शिक्षक विद्यार्थ्यांना मनापासून शिक्षण देत आहेत. पण त्याचवेळी, स्वतःच्या पोटासाठी संघर्ष करत आहेत. शिक्षण देण्याचे काम आम्ही थांबवले नाही. मग प्रशासनाने आमचा पगार का थांबवला?,’’ असा प्रश्न शिक्षण सेवक विचारत आहेत.
महापालिकेतील शिक्षण सेवकपदी झालेली नियुक्ती ही केवळ सहा महिन्यांच्या करार तत्त्वावर आहे. त्यातील पहिल्या दोन महिन्यांत पगार न मिळणे, हे अत्यंत अन्यायकारक आहे, अशी भावना शिक्षक व्यक्त करत आहेत. महापालिकेने सहा महिन्यांच्या करार तत्त्वावर नियुक्त केलेल्या हंगामी शिक्षण सेवकांना अद्याप मानधन का मिळाले नाही?, याबाबत महापालिकेची बाजू जाणून घेण्यासाठी महापालिकेच्या शिक्षण विभागाच्या उपायुक्त वसुंधरा बारवे यांच्याशी संपर्क साधला असताना त्यांनी प्रतिसाद दिला नाही.

आम्ही दोन महिन्यांपासून पगाराविना शिक्षण सेवा देत आहोत. दिवाळीपूर्वी पगार मिळेल, अशी आशा ठेवली होती. पण प्रशासनाच्या निष्काळजीपणामुळे ही आशाही मावळली आहे.
- एक शिक्षक

महापालिकेने सहा महिन्यांसाठी हंगामी तत्त्वावर ३ सप्टेंबर २०२५ रोजी शिक्षण सेवकांची नियुक्ती केली आहे. या शिक्षण सेवकांना वीस हजार मानधन देण्यात येईल, असे सांगण्यात आले. परंतु, दोन महिन्यांपासून मानधन देण्यात आलेले नाही. महापालिकेतर्फे सातत्याने आश्वासन दिले जात आहे. परंतु, प्रत्यक्षात काहीच हालचाल केली जात नाही. लवकरात लवकर मानधन मिळावे, अन्यथा तीव्र आंदोलन करण्यात येईल.
- सचिन डिंबळे, कार्यकारी राज्याध्यक्ष, महाराष्ट्र राज्य महानगरपालिका व नगरपालिका प्राथमिक शिक्षक संघ