सिंहगड किल्ल्यावर रविवारी स्वच्छता मोहीम

पुणे, ता. १९ : छत्रपती शिवाजी महाराजांच्या स्वराज्य स्थापनेतील सिंहगड किल्ल्याचे ऐतिहासिक महत्त्व जपण्यासाठी खासदार नीलेश लंके यांनी पुढाकार घेतला आहे. त्यातून गड-किल्ले स्वच्छता आणि संवर्धन मोहीम उपक्रमांतर्गत रविवारी (ता. २३) सिंहगडावर स्वच्छता मोहीम राबविणार आहे. यात शिवप्रेमी, पुणेकर नागरिक आणि तरुणाईने सहभागी व्हावे, असे आवाहन लंके यांनी पत्रकार परिषदेत केले आहे.
या मोहिमेचा आठवा टप्पा सिंहगडावर आयोजित केला आहे. लंके यांनी मार्च महिन्यात त्यांच्या वाढदिवशी हा उपक्रम जाहीर केला होता, ज्यात प्रत्येक महिन्याच्या एका रविवारी गडावर जाऊन स्वच्छता, संवर्धन व सांस्कृतिक जागृतीचे कार्य करण्याचा संकल्प केला आहे. ही मोहीम ‘आपला मावळा’ या बिगर राजकीय संघटनेच्या माध्यमातून राबविण्यात येत आहे. या मोहिमेद्वारे गडाच्या ऐतिहासिक पायाभूत रचनांचे संवर्धन, कचऱ्याची विल्हेवाट, तसेच देशभक्तीचे संस्कार प्रसारित करणे हे प्रमुख उद्दिष्ट आहे. रविवारी सकाळी ७ वाजता गडाच्या पायथ्यापासून या मोहिमेला सुरुवात होणार आहे.