येरवड्यात कोयते उगारून टोळक्याने पसरविली दहशत

पुणे, ता. १० : येरवड्यातील लक्ष्मीनगर भागात टोळक्याने कोयते उगारून दहशत पसरविल्याची घटना घडली, तसेच रहिवाशांना धमकावून शिवीगाळ केली. या प्रकरणी येरवडा पोलिसांनी आठ जणांविरुद्ध गुन्हा दाखल केला असून एकाला अटक केली आहे.
या प्रकरणी शैलेश मोहिते (रा. राज चौक, येरवडा) याला अटक केली आहे. याबाबत पोलिस शिपाई सूर्यकांत कांबळे यांनी फिर्याद दिली आहे. पोलिसांनी दिलेल्या माहितीनुसार, तक्रारदार हे येरवड्यातील लक्ष्मीनगर भागात राहायला आहेत. आरोपी मोहिते आणि साथीदार ५ ऑगस्टला रात्री अकराच्या सुमारास येरवड्यातील लक्ष्मीनगर भागात आले. आरोपींनी कोयते उगारून दहशत पसरविली. नागरिकांना शिवीगाळ केली, तसेच घराच्या दरवाजावर कोयते आपटून आरोपी पसार झाले. पसार झालेला आरोपी मोहिते याला अटक करण्यात आली. त्याच्याबरोबर असलेल्या साथीदारांचा शोध घेण्यात येत आहे.