महापालिकेला थेट पाठवा खड्ड्यांची छायाचित्रे

पुणे, ता. १४ ः पुणे महापालिकेच्या पथ विभागाने शहरातील रस्त्यांवरील खड्ड्यांची नोंद घेण्यासाठी ‘पीएमसी रोड मित्र’ मोबाइल ॲप विकसित केले आहे. या ॲपच्या माध्यमातून नागरिक खड्ड्यांची छायाचित्रे, फोटो आणि व्हिडिओ थेट महापालिकेला पाठवता येणार आहे. छायाचित्रासोबत ठिकाणाचे अक्षांश-रेखांश आपोआप नोंदवले गेल्याने पथ विभागाच्या अभियंत्यांनाही प्रत्यक्ष जागा पाहणी करून रस्ता दुरुस्ती केल्याचे छायाचित्र टाकावे लागणार आहे.
‘पीएमसी रोड मित्र’ आणि ‘नो युअर एरिया ऑफिसर’ या ॲपचे उद्‍घाटन महापालिका आयुक्त नवल किशोर राम यांच्या हस्ते करण्यात आले. अतिरिक्त आयुक्त ओमप्रकाश दिवटे, पथ विभाग प्रमुख अनिरुद्ध पावसकर आदी उपस्थित होते. शहरातील अनेक रस्त्यांची दुरवस्था झाली आहे. त्यात परत पावसामुळे आणि खोदकामानंतरच्या रस्त्यांना खड्डे पडतात, खडी पसरून अपघात होण्याचा धोका वाढतो हे वारंवार निदर्शनास येते; पण खड्डे बुजविण्यास विलंब केला जातो. नागरिकांना तक्रार करायची असली तरी ती कुठे करावी, असा प्रश्‍न उपस्थित होतो. गेल्या काही दिवसांत शहरात खड्ड्यांमुळे व असमान रस्‍त्यांमुळे दुचाकीस्वारांचे अपघात होऊन गंभीर जखमी झाले आहेत. त्यामुळे पथ विभागावर टीका केली जाते.
शहराच्या विविध भागात खड्डे पडल्यानंतर त्याची माहिती पथ विभागाला व संबंधित अधिकाऱ्यांना मिळावी यासाठी ‘पीएमसी रोड मित्र’ हे ॲप महापालिकेने तयार केले आहे. प्रत्यक्ष जागेवर जाऊन नागरिकांना छायाचित्रे व व्हिडिओ काढून तक्रार करता येणार आहे. त्याचे अक्षांश-रेखांशसुद्धा कळणार असल्याने संबंधित कनिष्ठ अभियंत्याला नेमका खड्डा कुठे पडला आहे, हे कळणार आहे. रस्ता दुरुस्ती पूर्ण झाल्यानंतर त्या ठिकाणाचे ‘पूर्वी व नंतर’ची छायाचित्रे ॲपमध्ये अपलोड केल्यानंतरच ही तक्रार बंद होईल. त्यामुळे अभियंत्यांना पळवाट काढता येणार नाही, असे आयुक्त नवल किशोर राम यांनी सांगितले.
पथ विभाग प्रमुख अनिरुद्ध पावसकर म्हणाले, ‘‘पथ विभाग विविध प्रकारचे सहा ॲप तयार करत आहे. त्यातील दोन ॲपचे मंगळवारी उद्‍घाटन झाले आहे. हे ॲप प्ले स्टोअरवरून डाऊनलोड करता येईल. ॲपमधील डॅशबोर्डवरून प्रत्येक भागातील तक्रारींची स्थिती, निवारणासाठी जबाबदार अधिकारी, तसेच कार्यवाहीची प्रगती याची सविस्तर माहिती मला बघता येणार आहे.

खड्ड्यांच्या अनेक तक्रारी नागरिक करणार आहेत. त्या तक्रारींचे निवारण ७२ तासांच्या आत करण्याचा आमचा प्रयत्न आहे. या ॲपच्या निमित्ताने प्रशासन सक्षमपणे काम करेल. तसेच खड्डे बुजविताना ते शास्त्रीय पद्धतीने व चांगल्या दर्जाचे काम केले आहे की नाही, हे सुद्धा लक्षात येणार आहे. नागरिकांनी या ॲपचा जास्तीत जास्त वापर करावा.
- नवल किशोर राम, आयुक्त, पुणे महापालिका