परराज्यातील विद्यार्थ्यांनी मराठी शिकण्याचा प्रयत्न करावा ः गोऱ्हे

पुणे, ता. १३ : ‘‘मराठी भाषा ही प्राचीन आणि सांस्कृतिकदृष्ट्या समृद्ध आहे. तिला हजारो वर्षांचा वारसा असून मराठी साहित्य, नाटकं, गाणी विलोभनीय आहेत. त्यामुळे परराज्यातून शिक्षणासाठी महाराष्ट्रात येणाऱ्या विद्यार्थ्यांनी मराठी भाषा शिकण्याचा प्रयत्न केला पाहिजे’’, असे मत विधानसभेच्या उपसभापती डॉ. नीलम गोऱ्हे यांनी व्यक्त केले.
एमआयटी आर्ट, डिझाइन व टेक्नॉलॉजी विद्यापीठ, विश्वराजबाग पुणेच्या दहाव्या स्थापना दिनानिमित्त आयोजित कार्यक्रमात डॉ. गोऱ्हे बोलत होत्या. यावेळी भारतीय अंतराळ संशोधन संस्थेचे (इस्रो) वैज्ञानिक डॉ. नागराजन वेदाचलम, मालवीय राष्ट्रीय इन्स्टिट्यूट ऑफ क्नॉलॉजीचे (एमएमआयटी) संचालक प्रा. डॉ. एन. पी. पाधी, एमआयटी एडीटी विद्यापीठाचे कार्याध्यक्ष तथा प्र. कुलपती प्रा. डॉ. मंगेश कराड, कुलगुरू प्रा. डॉ. राजेश एस., इस्कॉन पुणेचे प्रमुख राधेशाम, कार्यकारी संचालक प्रा. डॉ. सुनीता कराड, प्र. कुलगुरू डॉ. रामचंद्र पुजेरी, डॉ. मोहित दुबे, कुलसचिव डॉ. महेश चोपडे उपस्थित होते. याप्रसंगी प्रा. प्रदीप प्रभू यांना विद्यापीठाच्या जडणघडणीतील योगदानाबद्दल जीवनगौरव पुरस्काराने गौरविण्यात आले. त्यांच्यासह डॉ. अतुल पाटील, डॉ. राजशेखर राठोड, प्रा. तुषार चौरुशी, डॉ. शालिनी गर्ग, संदीप जाधव, यशस्विनी पिसोलकर यांचाही पुरस्कारांनी सन्मान झाला.