सेवादूत उपक्रमाला थंड प्रतिसाद

पुणे, ता. १४ : महा-ई-सेवा केंद्र, सेतू केंद्र, सामाईक सुविधा केंद्रांमध्ये मिळणारे सर्व दाखले ‘सेवादूत’ या उपक्रमातून आता घरबसल्या ॲपवर क्लिक करून देण्यासाठी जिल्हा प्रशासनाने गेल्या सहा महिन्यांपूर्वी सुरू केलेल्या सुविधेला प्रतिसाद मिळत नसल्याचे समोर आले आहे. या सुविधेचा लाभ आतापर्यंत केवळ ६२६ पुणेकरांनी घेतला आहे.
विविध कामांसाठी नागरिकांना आपल्या पाल्यांसाठी दाखले लागतात. परंतु त्यासाठी सामाईक सुविधा केंद्र, ई सेवा केंद्र, सेतू सेवा केंद्र या ठिकाणी जाण्यास वेळ नाही. नागरिकांची ही अडचण लक्षात घेऊन आता जिल्हा प्रशासनाने मार्चपासून घरबसल्या दाखले देण्यासाठी ही सुविधा सुरू केली. त्यासाठी जिल्हा प्रशासनाने ही सेवा देण्यासाठी सेवादूत नेमले आहेत. शहरी भागात या उपक्रमाला अपेक्षेपेक्षा चांगला प्रतिसाद मिळेल, अशी आशा होती. मात्र, गेल्या सहा महिन्यांत आतापर्यंत केवळ ६२६ पुणेकरांनी याचा लाभ घेतल्याचे आकडेवारीवरून स्पष्ट झाले आहे. आतापर्यंत ५३४ दाखल्यांचे वितरण या सेवादुतांमार्फत करण्यात आले आहे. योजनेचा प्रचार व प्रसार कमी प्रमाणात झाल्याने प्रतिसाद कमी मिळत असल्याचे सूत्रांचे म्हणणे आहे.

अशी आहे स्थिती
सुविधा केंद्र : ५३२
लाभार्थी नागरिक : ६२६
ॲपमधील आतापर्यंतच्या बुकिंग : ७१४
दिलेले एकूण दाखले : ५३५